ཅ་དང་འབྲེལ་བའི་དཔྱེ་གཏམ།

1. ལྕགས་ལུ་ཞུན་དང་ཞུན་ལུ་མཐར།
2. ལྕགས་ཨིན་སིང་སི་དང་། །རྡོ་ཨིན་ཀྲག་ཀྲ། །
3. ལྕགས་དང་དྲོནམོ་ཚ་ཏོམ་བསྣལ།

ང་དང་འབྲེལ་བའི་དཔྱེ་གཏམ།

ངེའི་གདོང་བ་ཁྱོད་ཀྱི་རྒྱལ་གསལ།
སྔུའི་གདོང་ལུ་ལེགས་གོ་མེད། །འཐབ་པའི་ཚིག་ལུ་ཧནམ་མེད། །
ངོ་ཚ་བ་གལ་ཆེཝ་གདམ།

ག་དང་འབྲེལ་བའི་དཔྱེ་གཏམ།

1. ག་བ་ག་དྲག་མི་ཤེས།
2. གངས་བར་ནང་གི་ཆུ་འཐུང་། །སྤྲིན་བར་ནང་གི་ཉིམ་བསྲོ། །
3. དགའཝ་རང་གིས་བཟོནི་ག་བཟོ། །སྐྱོམ་རང་གིས་སློངནི་ག་སློང་། །
4. དགའཝ་ཟད་སྐྱིདཔ་རྫོགས་རྫོགས་པའི་མི།
5. རྒྱ་བརྡུང་ཟ། །བོད་བཞོང་ཟ། །
6. སྒྱུར་མ་ཚུགས་པའི་ཆུ་སྒྱུར་བ་འདི། །སྒྱུར་ཚུགས་པའི་རྡོ་འགྱིརཝ་དྲག །
7. མགུ་འཁྱུ་བ་གདོང་དགཔ།
8. གྱི་དང་ཕོརཔ་གློ་ལུ་བཞག །ཆང་དང་འཐབམོ་ག་ཕྱད་མེད། །
9. གྱི་རིང་ཐུང་གོམས་པའི་གཡབ་ཨིན།
10. དགོན་པའི་རོ་ཁྱི་མ་བརྡུང་། །བླ་མའི་ཐུགས་ཁར་ཕོག་འོང་།།
11. གྱོས་མི་ལུ་འདྲི། །ཐག་རང་གིས་བཅད།།
12. གྱང་བར་ན་ར་འཐབ་དེས་འཐབ། བྱག་བར་ན་ར་འཐབ་དེས་འཐབ། དབྱེ་དཔྱད་མཛད་གནང་།
13. གླང་དགའ་སར་ཐོངམ་ཆག
14. གླང་ཅུང་དོག་ཆ་འགྲིགནི། །བཏབ་པའི་ལོ་ཐོག་ལེགས། །
15. གླང་གཉིས་འཐབ་ད་གཅིག་རྒྱལ་དགོ།
16. གླང་ཅུང་འབདནི་རྨོ་བཏུབ། །བ་ཐངམ་འབདནི་བཞོ་བཏུབ། །
17. གླང་རྒྱ་ཚ་གིས་ཨ་བ་ལམ་ལྟག་ཡང་གཏང་འོང་། །ལམ་འོག་ལུ་ཡང་གཏང་འོང་།
18. གླང་གིས་རྨོ་མ་སྟེར་བ་དང་། །བ་ཡིས་བཞོ་མ་སྟེརཝ་མི་འོང་། །
19. རྒྱུ་མ་སྤགས་ཀྱི་གྲས་ཁར་མི་ཚུད།
20. རྒྱུ་བར་སྟོང་གཏངམ་སྦྱིན་པ་མིན། །གླང་བརྙ་བར་གཏངམ་དཔའ་རྟགས་མིན།
21. གླེན་གོ་ལྟད་མར་འགྱོ་བར། །མགོ་དང་རྐང་པས་གོ་མ་ཆོད། །
22. སྒྱིད་པར་ཤ་མེད་པ། །གཉའ་བར་བྱ་ལ་བཀལ། །
23. འགྱིར་མ་ཚུགས་པའི་རྡོ་འགྱིར་བ་འདི། །བསྒྱུར་ཚུགས་པའི་ཆུ་སྒྱུརཝ་དྲག །
24. གོང་ཕུ་ནང་གི་མདའ་གཞུ། །བཀང་ས་ཡོད་རུང་རྐྱབ་ས་མེད། །

ཁ་དང་འབྲེལ་བའི་དཔྱེ་གཏམ།

1. ཁ་མཁས་མིའི་དཔོན།།མཇུག་དོག་སར་ཚུདནི་དེ་གིས་ཚུད།།ལཱ་ཤེས་མིའི་གཡོགཔོ།།ཟ་ཞིམ་ཅིག་ཟནི་དེ་གིས་ཟ།།
2. ཁ་ཨོམ་ས་མ་ཎི་གྱངས་མང་རུང་།།ཐུག་ས་མདོ་འཛིན་རྩ་བར།།
3. ཁ་ཐེག་ཁུར་འདྲོང་།།
4. ཁ་རྒྱང་པ་རླུང་འཛུལ། །རླུང་འཛུལ་བ་སོ་འཁོལ།།
5. ཁ་ལས་འཐོན་ཚེ་རླུང་། །རླུང་སྤར་བཞམ་ཚེ་གསེར།།
6. ཁ་བཤད་ཆུ་ཡི་ལྦ་ག །ལག་ལེན་གསེར་གྱི་ཐིག་པ།།
7. ཁ་བཤད་ཆུ་ཡི་ལྦ་ག །ནོརབུ་རྒྱ་མཚོའི་གཏིང་ལུ་མི་ཐིམ།།
8. ཁ་དང་ལགཔ་འཐབ་ད་ཀི་ལི་ཟུར་ཁ།
9. ཁག་ཆེ་མི་ཆེ་བླམ་ཆེ། །བླམ་བ་རང་ཆེ། །
10. ཁ་ལུ་གུ་རམ་བཙུགས།།ཧིང་ཁར་ལ་ཆུ་བཀལ།།
11. ཁ་གིས་ཨ་ཝ་ཟ།།མཆུ་ཏོ་དར་གྱིས་འཕྱག།
12. ཁག་པའི་ལཱ་ཅིག་མ་འབདནི། །མངར་བའི་ཟས་ཅིག་མི་འཐོབ།།
13. ཁྱི་མོ་མཇུགམ་མ་གཡུགནི། །ཁྱི་ཕོ་རྣཝ་མི་དཀྲོག།
14. ཁྱི་ཟ་ས་ལས་ཧབ།
15. ཁྱིའི་དགའ་ཚོར་མཇུགམ། །མིའི་དགའ་ཚོར་སེམས། །
16. ཁྱི་གྱང་གུར་ཨེབནི། །ཤོར་ནི་ཆུ་དང་ཨ་ཝ། །ཁྱི་གྱང་གུར་ཨེབནི།།བཏབ་ནི་སོ་ར་ཨིན།།དབྱེ་དཔྱད་གནང་།
17. ཁྱི་ནུབ་ཁྱི་བཟངམ་ཇོ་གིས་ཤེས།
18. ཁྱི་དང་བུཚ་འཛུམ་མ་སྟོན། །སྟོན་ར་སྟོན་ལྡན་ལྕག་སྟོན། །
19. ཁྱིམ་ཚང་བ་ཤི་རུང་། །མྱ་ངན་ཞག་གསུམ།
20. ཁུ་རུ་པའི་ཆང་ནང་། །ཞོལ་ལེམ་གྱི་དྲིམ་ཅིག་ཡོད།།
21. མཁོ་ཐང་ཁར་གླང་རྨོ་ནི་དང་། །དྭང་ཆུ་ཟམ་པར་ཉ་བཟུང་ནི་རྟགས་མི་མཐུན། །
22. ཁུར་ཨ་པས་འབག་ཚེ་ཡང་ཡང་འདྲ། །ཟས་ཨ་མས་ཟ་ཚེ་ཞིམ་ཞིམ་འདྲ། །
23. ཁུར་ཆ་གཡག་གིས་འབག །སྐད་འབྱོགཔ་གིས་རྐྱབ།
24. ཁེ་གྱོང་མེད་པའི་ཞིང་ཁར། །ཡང་རྗིད་མེད་པའི་གླང་རྨོ།

དྲན་གསོ་   ལྟག་ལུ་བཀོད་དེ་ཡོད་པའི་དཔྱེ་གཏམ་ཚུ་   ཨིནམ་མེན་གྱི་དབྱེ་བ་དཔྱད་ནིའི་དོན་ལུ་མ་གཏོགས་   མཐའ་དཔྱད་སྦེ་བཀྲམ་ནི་མེནམ་ཐུགས་ཁར་བསྣམ་གནང་།

ཀ་དང་འབྲེལ་བའི་དཔྱེ་གཏམ།

1. དཀའཝ་མ་སྤྱདནི་འབྲས་བུ་མི་འཐོབ།
2. སྐྱིདནི་གནམ་མཁའི་བྱ་ཡང་འཁོར། །སྡུགནི་མཆན་གྱི་བུ་ཡང་སྤང་། །
3. སྐྱེནི་རང་གིས་སྐྱེས་བའི་བུ། །གསགནི་རང་གིས་བསག་པའི་ནོར། །

རྫོང་ཁ་སླབ་ཐངས་ཀྱི་ལཱ་སྐོར།

 ༉   རྫོང་སླབ་ཐངས་སྡེ་ཚན་གྱིས་   ལོ་ངོ་༣ལྷགཔ་ཅིག་གི་རིང་ལུ་   མི་སྡེའི་བརྡ་བརྒྱུད་ཝི་ཅེཊ་ཐོག་ལས་   གསུང་གྲོས་གནང་སྟེ་   དེ་བསྒང་སླབ་སྲོལ་ཡོད་པའི་མིང་ཚིག་ཐོ་བཀོད་དེ་ཡོད་མི་ཚུ་  ད་རེས་ནངས་པ་དར་ཁྱབ་ཡོད་པའི་ཚིག་ཚུ་བཟུམ་སྦེ་   དར་ཁྱབ་གཏང་ནི་ལུ་རྩ་འགེང་དོ།

ཨིན་རུང་སེལ་ཏེ་ཟ་བ་ལྐོལམ་མི་ཐོག ཟེར་སླབ་དོ་བཟུམ་སྦེ་  གསུང་གྲོས་གནང་པའི་བཅུད་ག་དེ་སྦེ་ཐོན་ཡོདཔ་ཨིན་ན་ དཔེ་བཟུམ་ཅིག་འོག་ལུ་ཡོད།
ཀ་ཁལ་ཕྱད་དང་གཉིས་ལས་ རེ་རེ་ལུ་དཔྱེ་རེ་བཀོད་དེ་ཡོད་པའི་ མིང་ཚིག་ཚུ་གི་གོ་དོན་དང་  ཡིག་སྡེབས་དག་བཅོས་འབད་དགོཔ་ཡོདཔ་ལས་ མཐའ་དཔྱད་མེནམ་ཐུགས་ཁར་བསྣམ་གནང་།

ཀ༽ དཀར་སྒྲ་རྒྱུ་སྒྲ།

ཁ༽ ཁ་བཀལ་མགུ་བཀལ།

ག༽   གླ་འགྲིག་ལྟོ་འགྲིག

ང༽  མངར་ཆོས་ཆོས།

ཇ༽   རྗེས་ཧིང་བརྡར།

ཉ༽   ཉིན་ཞག་བུབ་དགུ།

ཏ༽   རྟ་ཕྲག་མི་ཕྲག

ཐ༽   ཐོབ་ཆགས།

ད༽   དུ་རུ་རུ།

ན༽   ནོར་བརྗེ་ཨ་དྲགས།

པ༽   པ་རི་སུ་རི།

ཕ༽   ཕག་ཕོག

བ༽   བར་མ་རི་ཅུ།

མ༽   མིག་མི་འཇེབས།

ཙ༽   རྩིངམ་ཉེས་དྲགས།

ཚ༽   ཚ་སྦྱེལ་ཐོར་ཐོ།

ཛ༽   རྫ་རྡུགས།

ཞ༽   ཞོན་བརྒྱུ།

ཟ༽   ཟམ་ཐག་ཆོད།

འ༽   འོང་ཅུ་ཁེ་ཁེ།

ཡ༽   གཡོ་ཏོག

ར༽   རུམ་ཐུད།

ལ༽   ལག་བརྗེ་ལུགས་བརྗེ།

ཤ༽   ཤ་ཀྲེག་སྐྱི་ཀྲེག

ས༽   སྲེག་གོག

ཧ༽   ཧོ་ཏོམ་རྩིས།

ཨ༽   ཨུག་དྲི།

 དྲན་གསོ་   དེ་བསྒང་སླབ་ནི་ཡོད་པའི་ མིང་ཚིག་ག་དེ་སྦེ་ཡོད་ག་མཁྱེན་ནིའི་དོན་ལུ་དཔེ་སྦེ་ཕུལ་ཕུལཝ་མ་གཏོགས་ ཞུ་དག་རྐྱབ་རྐྱབ་མེནམ་ལས་   གཞན་ལུ་སྤེལ་མ་ད་ཟེར་ཞུ་ནི་དང་།  ཧེ་མ་ལས་མཁྱེན་མི་ཚུ་ཐུགས་བསུན་མ་ཆེ་ཟེར་གསོལ་བཏབ་ཞུ་དོ་ལགས།

ཚ་ཆུ་ཕུའི་ས་གནས་ཁག་གི་མིང་གནས་བྱུང་ཚུལ།

སྤུ་ན་ཁ་ཆུ་ཕུ་ཚ་ཆུའི་གནས་བདག་མཁར་ཆེན་གྱི་རྒྱབ་ཁུངས།

ཨོ་རྒྱན་རིན་པོ་ཆེ་དང་ དཔལ་ཡེ་ཤེས་མགོན་པོའི་ལུང་བསྟན་དུས་ལུ་བབས་ཏེ་ དཔལ་འབྲུག་པ་རིན་པོ་ཆེ་ཞབས་དྲུང་ངག་དབང་རྣམ་རྒྱལ་གྱིས་ སྤུངས་ཐང་བདེ་བ་ཆེན་པོའི་ཕོ་བྲང་བཞེང་པའི་སྐབས་ གནས་བདག་གཞི་བདག་ཚུ་གིས་ རང་སོའི་ས་ཁོངས་ལས་བཅད་དེ་ ཕྱག་ཕྱིད་ཞུ་ནིའི་ཁས་བླངས་ཕུལ་བའི་སྐབས་ ཚ་ཆུ་ཕུ་གི་གནས་བདག་མཁར་ཆེན་གྱིས་ ས་ཁོངས་འདི་ ནགས་བཟང་ས་འབད་ནི་འདི་གིས་ ཅན་ལྡན། ཁ་ཤིང་། མཚན་ལྡན། སྟར་ཤིང་གི་རིགས་རྒྱགས་ཚད་ཡོདཔ་ལས་ ཤིང་གི་གཏེར་ཁ་ཕུལ་ནིའི་ཁས་བླངས་ཕུལ་ཏེ་ ཤིང་ཆས་ག་དེ་ཅིག་ ཕོ་ཆུ་བདའ་སྟེ་བསྐྱལ་བཏང་རུང་ རྫོང་བཞེང་ས་ལས་ ཤིང་ལང་པའི་བརྡ་ལན་ལྷོད་ནི་མེདཔ་ལས་ གནས་བདག་མཁར་ཆེན་གྱིས་ ལངམ་སྦྱིམ་སྒང་གི་ཟུར་ཁ་ལས་ རྫོང་བཞེང་སའི་ས་ཁོངས་ནང་གཡིབ་སྟེ་གཟིགསཔ་ ཞལ་ཕྱེད་ཀ་ཧོནམ་དང་ ཕྱེད་དཀརཔོ་སྦེ་བསྒྱུར་ཡར་སོངམ་མ་ཚད་ ཁ་ཆེ་སར་ཆད་སོང་ནི་འདི་གིས་ གནས་བདག་གི་མཚན་ཡང་ཁ་ཆདཔ་ཟེར་སླབ་ཨིནམ་སྦེ་ཁུངས་བཀལཝ་ཨིན་རུང་ གནས་པོའི་གསོལ་ཁ་ནང་ མཁར་ཆེན་དགྲ་ལྷ་ཡི་རྒྱལ་པོ་ཟེར་གསལ་ཏོག་ཏོ་སྦེ་བཀོད་དེ་ཡོད་ནི་འདི་གིས་ དེ་བ་ལྷག་པའི་བདེན་ཁུངས་བརྫངས་དགོཔ་མི་ནུག་ཟེར་མནོཝ་མས།

སྐྱེལ་པའི་ལོག 

ཆུ་ཕུ་ཚ་ཆུའི་གནས་བདག་གིས་ ཧེ་མའི་ཁ་ཚིག་དང་འཁྲིལ་ཏེ་ ཤིང་ཆས་ཕུལ་མ་བཏུབ་ཟེར་ སྤུངས་རྫོང་པའི་དམག་ཚུ་གིས་ དཔའ་རྟགས་གནམ་ཁར་འཕྱར། དགྲ་ལི་རླུང་ལུ་བསྐྱེལ། མེ་མདའ་པག་ཆེན་གྱི་འུར་སྒྲ་དང་བཅསཔ་སྦེ་ གནས་བདག་མཁར་ཆེན་བདའ་སྟེ་ ད་ལྟོ་བསྐྱེལ་པའི་ལོག་གཡུས་ཚན་ནང་དམག་འཐབ་པའི་ཤུལ་ལུ་ སྤུངས་རྫོང་པའི་དམག་ཚུ་ལོག་ཡར་སོ་ནི་འདི་གིས་ ས་ཁོངས་ཀྱི་མིང་ཡང་ལོག་པའི་ཐང་ཟེར་སླབ་ཨིནམ་སྦེ་བདེན་ཁུངས་བརྫངས་ནི་འདུག

ད་རུང་རྟིང་མ་སྤུངས་རྫོང་པའི་དམག་ཚུ་ ཚ་ཆུ་ཕུ་ལུ་འོངམ་ད་ གནས་བདག་མཁར་ཆེན་གྱིས་རྫུ་འཕྲུལ་བསྟན་ཏེ་ ལམ་ལྟག་ལས་ སྡེཔ་གུ་ལྕགས་སྐྱུར་ཏེ་དམག་རྐྱབ་སྟེ་འབད་རུང་ ལོག་རྟིང་མ་ སྤུངས་ཐང་རྫོང་གི་དོན་ལུ་ཤིང་ཆས་ཕུལ་ཡོདཔ་ཨིན་པས། ས་གནས་འདི་ནང་ ལམ་ལྟག་ལས་མར་རྡོ་བུད་འོང་སག་ས་སྦེ་ཡོད་མི་དང་ ཕྱག་བཤེད་རྡོ་གུ་བླུགས་པའི་གྲམ། ཆིབས་ཀྱི་ཆག་ཟ་སའི་ཤུལ་ཚུ་གསལ་ཏོག་ཏོ་སྦེ་ ད་ལྟོ་བར་ན་མཇལ་ནི་ཡོདཔ་ཨིན་པས།

བྱལ་སྒང་གི་རྒྱབ་ཁུངས།

ཤར་ཀ་གཞི་ལས་ མ་རྡོག་གཅིག་ལུ་བུ་རྡོག་གཅིག་ཨིན་མི་དོན་གྲུབ་ཟེར་ སྐྱེས་རིགཔ་བཟང་དྲགས་ཡོད་མི་འདི་ ཆུ་ཕུ་ཚ་ཆུ་ལྷོདཔ་ད་ གནས་བདག་མཁར་ཆེན་ལུ་གསོལ་ཁ་དང་ སྙན་གསོལ་ཕུལ་ཞིནམ་ལས་ ཆོས་རྒྱལ་དྲི་མེད་ཀུན་ལྡན་ ཐར་བཤུད་དཀའ་སྤྱད་གནང་སའི་རིའི་སྤྱི་ཏོ་གུ་ སྡོ་ཉམས་སྤྲོ་ནི་མས་ཟེར་ ག་གིས་བསྒོར་རུང་བསྒོར་མ་ཚུགས་པ་རྒྱབ་ཐལ་བའི་ཤུལ་ལུ་ རིའི་རྩེ་མོ་ལས་དུ་པ་བཏང་སར་ ཚ་ཆུ་སྡོད་མི་ཚུ་གིས་མཐོང་རུང་ ལོག་འོང་ནི་མེད་པར་ཡུན་རིངམ་ཡར་སོངཔ་ལས་ ཕམ་སྤུན་ཆ་ཚུ་སྔུམ་རལམ་འཐབ་སྟེ་ ཉིན་ནུབ་བདའ་སྦྱེལ་འཚོལ་རུང་མ་ཐོབ་པས། ཨིན་རུང་ཚར་གཅིག་འབདཝ་ད་ ཨའི་དང་ཕྱད་པར་འོང་སྟེ་ ང་བཅས་མ་སྨད་གཉིས་ཚེ་འདི་ལུ་ཕྱད་པའི་མཇུག་ད་རིས་ཨིན་པས། ང་ས་གནས་འདི་ཁ་ལས་བརྒལ་ཏེ་འགྱོ་མི་ཆོག་པའི་དམ་བཅའ་ཡོད་ཟེར་སླབ་ཞིནམ་ལས་ བང་ཅུང་ཁ་བཅད་བཅདཔ་ཅིག་ཨའི་ལུ་སྤྲོད་དེ་ ཞག་གསུམ་མ་ལང་ཚུན་ཁ་མ་ཕྱེ། ཞག་གསུམ་གྱི་རྟིང་མར་ཁ་ཕྱེ་བལྟ་ཟེར་སླབ་འབད་སྦེ་ མ་སྨད་གཉིས་ཁ་གྱེས་ཡར་སོང་ནུག དེ་ལས་ཨའི་གིས་ ཞག་གསུམ་གྱི་ཤུལ་ལས་བང་ཅུང་ཁ་ཕྱེ་སྟེ་ལྟཝ་ད་ དེའི་ནང་ན་ གཡུ། བྱུ་རུ། མུ་ཏིག ནོར་བུའི་བྱེ་བྲག་ཐང་མེདཔ་ཅིག་ཡོད་ནི་འདི་གིས་ ཁོང་བཟའ་ཚང་ཚུ་ཕྱུགཔོ་འདོད་དྲགས་ཅིག་ལུ་འགྱུར་སོ་ནུག ས་དབྱིབ་སྒང་དང་མ་སྨད་གཉིས་ཁ་བྱལ་ས་འབད་ནི་འདི་གིས་ ས་གནས་ཀྱི་མིང་ཡང་བྱལ་སྒང་ཟེར་སྲོལ་བྱུང་རུང་ ཤུལ་ལས་མིང་གི་ཟུར་ཉམས་ཏེ་ བྱལ་སྐད་སྒང་ཟེར་དར་ཁྱབ་སོང་ནུག

དེ་གིས་ཡང་མ་དོ་བར་ རོ་པའི་མགོ་སྐྱེས་ཞྭརཝ། ཤར་གྱི་ཨ་ལུ་དཔལ་འབྱོར་ཟེར་མི་ཚུ་ཡང་ གནས་བདག་མཁར་ཆེན་གྱི་འཁོར་སྦེ་ཚུད་དེ་ཡོདཔ་ཨིན་པས།

བུམ་ལྟག་ཁ་མིང་བཏགས་དགོ་པའི་ཁུངས།

མཁར་ཆེན་གྱི་གནས་ཁང་གི་སྒོ་ར་སྒོ་དང་པ་འདི་ ལངམ་སྦྱིས་སྒང་ལུ་ཨིནམ་མ་ཚད་ གཉིསཔ་འདི་བུམ་ལྟང་ཁར་ཨིན་པས། ས་ཁོངས་བུམ་པའི་དབྱིབས་བཟུམ་སྦེ་ཡོད་པའི་ལྟག་ལུ་འབད་ནི་འདི་གིས་ ས་གནས་ཀྱི་མིང་ཡང་བུམ་ལྟག་ཁ་ཟེར་སླབ་ཨིན་པས། ས་ཁོངས་དེ་ཡར་བཅད་ཀྱི་མི་སེར་ཚུ་ ཆུ་ཕུ་ཚ་ཆུ་ལུ་འགྱོཝ་ད་ ཕྱོགས་ཕོག་མི་ཕོག་བལྟ་མི་དགོཔ་ཨིན་པས།

སྐྱེལ་པའི་ལོག་ཟེར་བའི་མིང་གནས་བྱུང་ཚུལ།

ཆོས་རྒྱལ་དྲི་མེད་ཀུན་ལྡན་གྱི་ཞབས་སྐྱེལ་འོང་མི་ཚུ་ ས་གནས་དེ་ཁ་ལས་ལོག་ རྒྱ་གར་ནང་སོང་ནི་འདི་གིས་ ས་ཁོངས་ཀྱི་མིང་ཡང་སྐྱེལ་པའི་ལོག་ཟེར་སླབ་སྲོལ་བྱུང་ནུག

སླབ་སྲོལ་གཞན་ཅིག་ལས་ ཆོས་རྗེ་འབྲུག་པ་ཀུན་ལེགས་མཆོག་ ཚ་ཆུ་ཕུ་ཁ་ཐུག་ལུ་ཞབས་སྐོར་ལུ་བྱོནམ་ད་ གཡུས་ཚན་འདི་ནང་གི་མི་སེར་ཚུ་གིས་ བློ་ཕོག་ཡིད་ཕོག་སྦེ་ ཆོས་རྗེ་རིན་པོ་ཆེ་ལུ་ ཆབ་ཆུ་འབོལ་ཚད་མེདཔ་སྦེ་དྲང་ནི་འདི་གིས་ གནམ་མེད་ས་མེད་ཐུགས་དགྱེས་ཏེ་ ཁྱིམ་འདི་ནང་འདོད་ཡོན་གྱི་བསྐལཔ་ཆགས་ནུག་ཟེར་གསུངས་ཞིནམ་ལས་ ཡ་གི་ས་གནས་ནང་བྱཱ་འཚོ་ག་མི་འཚོ་ལྟ་གེ་ཟེར་ ཞལ་ཆུ་ཕུ་ཚ་ཆུ་ཁ་ཐུག་ལུ་བསྒོར་ཏེ་ ཐུགས་སྨོན་གནང་ཞིནམ་ལས་ ཕྱག་འབྲུ་སྟོར་གནངམ་ད་ འབྲུ་ཕུད་རྡོག་གསུམ་འབད་མི་ཅིག་ཧུམ་པ་ཐང་གི་ལྟག་ རྡོག་ཕུག་གཅིག་གུ་ཆགས་པའི་རྟེན་འབྲེལ་གྱིས་ གཡུས་ཚན་འདི་ས་ཁ་མཐོ་སུ་ཅིག་ཨིན་རུང་ བྱཱ་འཚོཔ་མ་ཚད་ ད་རིས་ནངས་པ་ཡང་རྡོག་ཕུག་གུ་བྱཱ་བོང་ཁོགས་གསུམ་ཡ་མཚན་ཆེ་ཏོག་ཏོ་སྦེ་སྐྱེས་ཏེ་ཡོདཔ་ཨིན་པས། ཆོས་རྗེ་རིན་པོ་ཆེ་གིས་ ཁྱིམ་འདི་ནང་འདོད་ཡོན་གྱི་བསྐལཔ་ཆགས་ནུག་ཟེར་གསུངསམ་མ་ཚད་ ས་ཁོངས་འདི་ཁ་ལས་ ལོག་སྤུངས་ཁ་ཐང་ཁ་ཐུག་བྱོན་ནི་འདི་གིས་ ས་གནས་ཀྱི་མིང་བསྐལ་པའི་ལོག་ཟེར་དར་ཁྱབ་སོང་ནུག

རྟ་མི་ཨ་ལུ་ཟ་ས།

ཧེ་མའི་དུས་ལུ་ རྟ་མི་འདམ་ཆིའི་ཨམ་སྲུ་ཚུ་གིས་ ཨ་ལུ་ག་དེམ་ཅིག་སྐྱེས་རུང་ མི་གསོ་དོ་ཡོདཔ་ལས་ གཡུས་ཁའི་མི་ཚུ་གྱོས་སྐོར་བསྡུ་སྟེ་ ག་ཅི་གིས་གཡོ་འཕྲུལ་ཅིག་ཨིན་ན་ཟེར་ཐུགས་བརྟག་ཞུཝ་ད། གཡུས་ཚན་གྱི་གདོང་ཕྱོགས་ལུ་ བྱག་གུ་སྲིན་པོའི་གཟུགས་བརྙན་ཡོད་ནི་འདི་གིས་ཨིནམ་ལས་ གཡུས་མི་ཚུ་གིས་ སྲིན་པོའི་མཆེཝ་གི་ཚུལ་སྦེ་ཡོད་མི་རྡོ་སྤོག་བཀོ་ཞིན་ན་ལས་ཚུར་ ཧེ་མ་བཟུམ་སྦེ་གནོད་རྐྱེན་མ་བྱུངམ་པས་བཤདཔ་ཨིན་པས།

མཁར་ཆེན་པའི་མར་ཁུ་བཙིར་ས།

གནས་བདག་མཁར་ཆེན་གྱི་ མར་ཁུ་བཙིར་ས་ཨིན་ཟེར་ རྡོ་ཕུག་ཅིག་ཡོད་མི་འདི་ ཚོས་གཞི་སྨུག་ཙིག་ཙི་ཧུམ་ཆོབ་ཆོ་སྦེ་ཡོད་པ་ཅིན་ གཡུས་ཁར་སྤང་ཙི་ལོ་ལེགས་པའི་རྟགས་དང་ གནས་རྡོ་འདི་ཐལ་ཁོགས་རི་རི་ཨིན་པ་ཅིན་ སྤང་ཙི་ལོ་མི་ལེགསཔ་སྦེ་ཡིད་ཆེས་བསྐྱེདཔ་ཨིན་པས།

ཁུངས་སྐྱེལ་མི་ རྫོང་ཁ་སླབ་ཐངས་སྡེ་ཚན་གྱི་ཚོགས་ཆུང་གི་འཐུས་མི་ ཆེད་བསྟོད་ཅན་གྱི་འཐུས་མི་བགྲེསཔ་རྣམ་རྒྱལ་དབང་ཕྱུག་ཨིན། ཨིན་རུང་ཝི་ཅེཊ་སྡེ་ཚན་ནང་ཉན་ཏེ་ བྲིས་བྲིསཝ་འབད་ནི་འདི་གིས་ དུམ་གྲ་རེ་ལྷག་ཆད་ཞུགས་ཞུགསཔ་འོང་། དེ་འབད་ནི་འདི་གིས་ ཟིན་བྲིས་ཨིན་པའི་ཐུགས་བཞེད་གནང་སྟེ་ ཧེང་སྐལ་ཁུངས་སྐྱེལ་ནི་དང་ བཅོ་ཁ་རྐྱབ་དགོཔ་ཡོད་པ་ཅིན་ དེ་འཕྲལ་ལས་གསུངས་གནང་ལགས།