ས་སྟེང་།

 འབྲུག་ཆོས་ལྡན་གྱི་རྒྱལ་ཁབ་ ཤར་ཕྱོགས་སག་སྟེང་དྲུང་ཁག་འོག་ལུ་ཆགས་ཏེ་ཡོད་མི་ སྡོ་ཉམས་སྤྲོ་བའི་སག་སྟེང་གཡུས་ཚན་འདི་ གནས་མཆོག་རྩ་རི་བསྡུས་པ་བྷ་ག་བྱང་གི་སྦོ་ལོགས་ གམ་གསར་འབྲོག་ལས་བབས་པའི་འབྲུག་ཤར་ཕྱོགས་གམ་རི་གཙང་ཆུའི་འབྱུང་ཁུངས་ཡང་ཡིན་ལ། རྩ་རིའི་གནས་བསྡུས་པ་ལས་ཀྱང་ཤིན་ཏུ་བསྡུས་པ་རྣམས་ཀྱང་ཡུལ་འདི་ཉེ་འཁོར་དུ་ཡོད།སློབ་དཔོན་པདྨ་འབྱུང་གནས་ཀྱིས་མ་འོངས་སྟག་མའི་ལྗོངས་སུ་སྦས་ཡུལ་སྟག་མའི་ལྗོངས་ཞེས་མཚན་ནས་གསོལ་ཏེ་བྱིན་གྱིས་རླབས་གནང་བ་ཡིན། བྱིན་གྱི་རླབས་བཞིན་དུ་མཐའ་བཞི་ཕྱོགས་མཚམས་བརྒྱད་དུ་དགུན་དུས་གངས་རི་དང་། དུས་བཞི་ནགས་རིའི་སྐོར་བ། ཡུལ་གྱི་ཉེ་ཁོར་དུ་སྟག་མ་དང་སྟག་གོར་ཤིང་གི་མེ་ཏོག་མཛེས་ཤིང་ཡིད་དུ་འོང་བ་ཡོད། ཡུལ་ལུང་ཞོགས་གཅིག་ཏུ་རྒྱ་མཚོའི་རྦ་རླབས་གཡོ་བ་ལྟ་བུའི་གམ་གསར་ལས་འབྱུང་བའི་ཕ་རི་གཙང་ཆུ་རྒྱུགས་ལ། ལྗོངས་འདིའི་གཡས་སྟོད་དུ་སག་སྟེང་གུ་རུའི་བླ་བྲང་བསམ་གཏན་ཆོས་གླིང་དང་། གཡོན་སྟོད་དུ་གསོལ་དཔོན་གྱི་དབེན་གནས་རྣམ་རྒྱལ་ཆོས་གླིང་། ཡུལ་མཇུག་ཏུ་བླ་མ་བསྟན་པའི་སྒྲོན་མེས་ཀླུ་དོལ་པ་ནག་པོ་དམ་ལ་བཞག་པའི་བཀྲ་ཤིས་ཆོས་གླིང་ལྷ་ཁང་ཡོད།

སྔོན་དུས་རབས་བཅུ་གཉིས་པའི་ནང་སྨྱུག་མའི་རིགས་ལས་སག་ཟེར་བའི་སག་གིས་སྐོར་ནས་ཡོད་པར་སག་སྟེང་ཞེས་ཐོགས་པ་ཡིན།

ཡུལ་འདིའི་མི་རྒྱུད་ནི་དང་ཐོག་མཚོ་མཚོ་སྣ་ནས་འབྱུང་ལ། ཆོས་བརྒྱུད་ནི་དུས་རབས་བཅོ་ལྔ་པའི་ནང་སག་སྟེང་གུ་རུ་རིན་པོ་ཆེ་སྐུ་ཕྲེང་བཞི་པ་བླ་མ་བསྟན་པའི་སྒྲོན་མེས་སྲོལ་ཕྱེ་གནང་བའི་རི་བོ་དགེ་ལྡན་པའི་ཆོས་བརྒྱུད་ཡིན། གྱོན་ཆས་ནི། ཕོ་གོས་རྩིད་ཞྭ་དང་། སྣམ་བུ་ཕྱུ་པ། རྐང་གོས། པི་ཤུབ། པགས་ལྷམ་བཅས་ཡིན། མོ་གོས་རྩིད་ཞྭ་དང་། སྟོད་ཐུང་།  ཤིང་ཁ། པང་ཁེབ་སྐེ་རག སྨད་དཀྱིག་མ། ཙང་ལྷམ། ལྷམ་སྒྲོག་བཅས་ཡིན། དེ་དག་འཆང་བའི་སྐབས་སུ་མཛེས་སྡུག་ཧ་ཅང་མཐོང་། ཡང་ཡུལ་འདིའི་ཐུན་མིན་གྱི་སྲོལ་རྒྱུན་ནི། བླ་མ་བསྟན་པའི་སྒྲོན་མེས་བ་ལུང་མཚོ་ནས་ཀེང་བག་མང་པོ་གཏེར་དུ་བཞེས་སྟེ་སྲོལ་བཙུག་གནང་བའི་ལོ་གསུམ་རེའི་བར་མཚམས་དམངས་སྐུ་རིམ་དང་ཀེང་འཆམ་ཟེར་བ་ཐེར་གོང་ཕུད་དེ་ཀེང་འཆམ་རྒྱབ་པ་སོགས་དངོས་གཞི་ཉིན་གསུམ་རིང་གནང་སྲོལ་ཡོད་ལ། གུ་རུ་སྐལ་བཟང་དོན་ཡོད་བསྟན་འཛིན་གྱིས་སྲོལ་བཙུག་གནང་བའི་རང་ཟླ་བཞི་པ་དང་དྲུག་པའི་ནང་སྨྱུང གནས་དང་། རང་ཟླ་གསུམ་པ་དང་བདུན་པའི་ཚེས་བཅོ་ལྔ་ལ་ཆོས་སྐོར་བཅས་ལོ་ལྟར་གནང་སྲོལ་བཟང་པོ་བཅས་ཡོད་དོ།།