འབོལ་སྒར་ན།

༉ ས་དགའ་བ་འབྲུག་གི་གཡུས་ལུ་སྨོ། །ཉམས་དགའ་བ་འབོལ་སྒར་ལུང་པ་ཆགས། །ཕམ་སྤུན་ཆ་བྱང་ཆུབ་སེམས་དཔའི་རིགས། །བྱམས་བརྩེ་བའི་ཕྱུག་པའི་གཡུས་གཅིག་ཨིན། །ཡར་ལ་སྟོད་སིང་ཅུ་ལ་མོའི་གདོང་། །མར་བསྟོད་པའི་གཡུས་ཀྱི་རི་མགོ་ལུ། །བར་ཤིང་དང་མེ་ཏོག་སྨན་སྣ་ཡིས། །གཡུས་འབོལ་སྒང་ལྷ་ཡུལ་བཟུམ་ཆགས་ཡོད། །གཡུས་བཀོད་པ་གསེར་གྱི་གཞོང་མ་བཟུམ། །ཕྱི་ལྕགས་རི་ཤིང་ཆེན་སྨན་གྱིས་བརྒྱན། །ནང་འབྲུ་ན་དགུ་ཡིས་ལོ་ཏོག་གིས། །གཡུས་འདི་ནང་དགའ་བའི་མེ་ཏོག་ཤར། །ཞལ་གསུང་ཐངས་ཁུ་བྱུག་སྔོན་མོ་བཟུམ། །འཛུམ་འཇའ་བ་ལྷ་ཡི་བུ་མོ་འདྲ། །གཡུས་འདི་དང་འདྲ་བ་འཇིག་རྟེན་ན། །ཡོད་ཟེར་འདི་མ་མནོ་མཉམ་རོགས་ཚུ། །གཡུས་བོད་སྒར་ལུང་པའི་རིགས་འདི་སྨོ། །རོགས་གཞན་གྱིས་བཤད་ཚེ་བོད་རིགས་ཟེར། །དེ་མ་བདེནམ་དངོས་སུ་ལག་བཟུང་མས། །ད་བརྟག་ཤིང་དཔྱད་ཤིག་མཁས་པ་ཚུ། །བུ་རང་གིས་དཔྱད་པའི་ལོ་རྒྱུས་ཅིག །དུས་ད་རིས་རྫོང་ཁ་སླབ་ཐངས་ནང་། །ཚིག་སྙན་པའི་སྙན་ངག་མ་ཤེས་རུང་། །གཏམ་ཡི་གེའི་ཐོག་ཏུ་ཞུ་ནི་ཨིན། །དུས་ད་ལྟོ་ཚུན་ཚོད་གཡུས་ཀྱི་མིང་། །འབོལ་སྒང་ཟེར་མིན་པ་བོད་སྒར་ཟེར། །ཞལ་གསུང་བའི་སྒྲ་གདངས་བརྟག་ཤིང་ན། །བོད་སྒར་ཟེར་སླབ་སྲོལ་དར་ཁྱབ་སོང་། །བོད་སྒར་ཟེར་གསུང་བའི་ཚིག་ལུ་བརྟགས། །གཞན་མཁས་པས་བོད་པའི་རིགས་ཨིན་ཟེར། །ཡིག་སྡེབ་ལུ་བལྟ་སྟེ་སླབ་མས་ཟེར། །དེ་ཤེས་པར་མཛོད་ཅིག་མཉམ་རོགས་ཚུ། །བོད་སྒར་ཟེར་ཡོད་པའི་གཡུས་འདི་ནི། །ག་ཏེ་སྨོ་ཟེར་ཏེ་ཞུ་བ་ཅིན། །ཐིམ་ཡུལ་གྱི་རྟ་མགོའི་རྩ་བ་ལུ། །བོད་སྒར་ཟེར་བོད་པའི་རིགས་ཅིག་ཡོད། །སྟོད་པའི་གཡུས་ཁ་སྟོད་ཁ་སྨད་ལས། །ཁ་སྟོད་ལུ་ཆགས་པའི་གཡུས་ཀྱི་མིང་། །བོད་སྒར་ཟེར་མེན་པ་འབོལ་སྒར་ཟེར། །ད་ཤེས་པར་མཛོད་ཅིག་སྤུན་ཆ་ཚུ། །འབོལ་སྒར་ཟེར་ཁ་མཁས་ལྕེ་བདེ་བཀལ། །སླབ་མས་ཟེར་མནོ་བསམ་མ་གཏང་ཤིག །ད་ང་གིས་གསལ་ཏེ་ཞུ་ནི་ཨིན། །ད་ཁྱེད་རང་ལེགས་པོར་གསོན་གནང་མས། །ཕ་དཔལ་ལྡན་འབྲུག་པ་རིན་པོ་ཆེ། །བླམ་ཞབས་དྲུང་ག་དབང་རྣམ་རྒྱལ་གྱི། །མར་སློབ་མ་ཁྲི་དང་འབུམ་ནང་ལས། །ཁོ་མཁས་པ་གྲུབ་པའི་དབང་ཕྱུག་ཟེར། །བླམ་ངག་དབང་བསམ་གཏན་རྣམ་ཐར་ལས། །གསུང་ཡོད་པ་ཀུན་གྱིས་ཤེས་དགོཔ་ཨིན། །འབོལ་སྒར་ཟེར་ཚིག་གི་དོན་དག་འདི། །ས་རྩུབ་པ་མེན་པ་འཇམ་པ་ལུ། །ཆོས་ཚིག་ནང་འབོལ་པ་སླབ་སྲོལ་འདུག །དཔེ་འདི་དང་འདྲ་བ་འཇམ་པའི་རིགས། །མི་གཤིས་ཀ་འཇམ་པའི་རིགས་ཚུ་ལུ། །འབོལ་པོ་ཟེར་སླབ་སྲོལ་ཡོད་པ་ལས། །གཡུས་འདི་གི་མིང་ཡང་འབོལ་སྒར་ཟེར། །གཏམ་གྲགས་ཏེ་འོང་པ་ཤེས་དགོཔ་ཨིན། །རང་གཡུས་ཀྱི་ཕམ་དང་སྤུན་ཆ་གིས། །དུས་དེ་ལས་ཕར་ཚུ་རང་གཡུས་མིང་། །བོད་སྒར་ཟེར་མེན་པ་འབོལ་སྒར་ཟེར། །གསུང་གནང་བའི་རེ་བ་ཞུ་དོ་ལགས། །བུ་ཤེས་བྱ་ཆུང་བའི་སྟབས་ལས་བརྟེན། །ཡར་གོང་ལས་ཞུ་བའི་ཚིག་དང་དོན། །ནོར་བ་དང་འཛོལ་བ་འབྱུང་སྲིད་པས། །ད་བཟོད་པ་བཞེས་ཤིག་སྙིང་ཚིག་གོ། ། འབྲི་མི་སངས་རྒྱས་འབྲུག་པ་མཁའ་འགྲོ།

༼དཀར་བཞོང་གི་རྒྱབ་ཁུངས།༽

དཀར་གཞོང་གི་རྒྱབ་ཁུངས།

༉ དཀར་གཞོང་ཟེར་བའི་གཡུས་ཚན་འདི་  རྫོང་ཁག་ཀྲོང་གསར་ རྒེད་འོག་ནུབ་སྦི་ལུ་ གཡུས་ཚན་ཉམས་དགའ་ཏོག་ཏོ་ཅིག་གི་གྲས་ཁར་ཨིན། དེ་ཡང་རྒྱ་གར་འཕགས་པའི་ཡུལ་གྱི་བྱང་ཕྱོགས་ བོད་ཁ་བ་ཅན་གྱི་ལྷོ་ཕྱོགས་ ང་བཅས་རང་དཔལ་ལྡན་འབྲུག་པའི་ས་ཡི་ལྟེ་བ་ དབུས་ཕྱོགས་རྫོང་ཁག་ནང་ཆགས་ཏེ་ཡོད། གཡུས་ཚན་འདི་རང་བཞིན་གྱིས་ཕུན་སུམ་ཚོགས་མི་དེ་ཡང་ ཧེ་མ་ཚེ་ལོ་བརྒྱད་ཁྲི་ཐུབ་པའི་དུས་ལུ་ ཆོས་རྒྱལ་དྲི་མེད་ཀུན་ལྡན་དང་ བྱང་ཆུབ་སེམས་དཔའ་ཚུ་གིས་ སྤྱོད་པ་བསྐྱངས་པའི་གནས་བདུད་རིགས་ཧ་ཤང་རི་ལས་ཐག་ཉེ་སར་དང་། ཨྱོན་གུ་རུ་རིན་པོ་ཆེ་གིས་ ཞབས་ཀྱིས་བཅགས་ བྱིན་གྱིས་བརླབས་གནངམ་མ་ཚད་ ཞབས་རྗེས་དང་སྐུ་རྗེས་ཚུ་ མ་འོངས་པའི་སེམས་ཅན་ཚུ་གི་དད་རྟེན་ལུ་བཞག་གནང་བའི་ ས་གནས་ཁྱད་པར་ཅན་ཅིག་ཨིན། གཡུས་ཚན་འདི་གི་མིང་དཀར་གཞོང་ཟེར་མི་བཏགས་དགོ་མི་འདི་ གཡུས་འདི་ནང་སྐྱེས་མི་ཚུ་ ཕྱི་བལྟ་བའི་གདོང་དཀར་བའི་ཁར་ ནང་མནོ་བའི་སེམས་བཟང་པོ་དང་ལྡན་པའི་སྒྲ་དཀར་ལུ་སྦྱར་ཏེ་དཀར་དང་ གཡུས་འདི་དབྱིབས་གཞོངམ་དང་འདྲཝ་སྦེ་ཡོདཔ་མ་ཚད་ གངས་དཀར་སྤུན་གསུམ་ལས་འབབ་པའི་ མང་སྡེ་ཆུ་འདི་ཡང་མདོག་དཀར་བའི་ཁར་ འབྲུ་སྣའི་དགུདང་ཤིང་འབྲས་ཀྱི་རིགས་ཚུ་ཡང་ཧ་ལམ་ཅིག་ཚོ་ཚུགསཔ་ལས་ ཕུན་སུམ་ཚོགས་པའི་རྒྱུ་མཚན་གྱིས་ གཡུས་ཀྱི་མིང་ཡང་དཀར་གཞོང་ཟེར་དར་ཁྱབ་སོང་ནུག དེ་ལས་གཡུས་ཀྱི་རྒན་ཤོས་ཚུ་གི་ཞལ་རྒྱུན་ལས་འབད་བ་ཅིན་ སའི་ཆགས་ཐངས་ཟངས་གཞོང་་ཁ་སྤུབ་བཞག་བཞགཔ་བཟུམ་གུ་  ཕགཔ་ཕོ་མོ་གཉིས་ཀྱིས་ ཚང་བཟོ་ཡོད་མི་འདི་གུ་ གཡུས་ཚན་ཆགས་ཡོད་ནི་འདི་གིས་ དཀར་གཞོང་ཟེར་སླབ་སྲོལ་དར་ཁྱབ་སོང་ཡོདཔ་སྦེ་བཤདཔ་ཨིནམ་ད། དེ་ཡང་མང་་སྡེ་པའི་ཁ་སྐད་ནང་ ཕག་པའི་ཚང་ལུ་དཀར་ཟེར་སླབ་སྲོལ་ཡོདཔ་ཨིན་པས། འབྲི་མི་ ཉམ་ཆུང་བུ།

རྫོང་ཁའི་མིང་ཚིག་དར་ཁྱབ་གཏང་མ་ཚུགས་པའི་རྒྱུ་རྐྱེན།

ཁ་སྐད་གཞན།	རྫོང་ཁ་སྐད་ཡིག
ཀ་ཅ་ར།	འབྲེལ་ཧིང་ཚ་དྲགས།
ཀི་ལྟབ།	དཔེ་དེབ།
ཀི་ཏི་ལི།	ཇམ་སྦྱིས།
གྷནཱ་ཌ།	ཆུ་ཚོད།
གྷ་རི།	སྣུམ་འཁོར།
ཅ་པ་ལི།	ཀྲེ་ཀྲེམ།
ཅཱ་དར།	གདན་ཁེབས།
ཆུ་ཊི།	ངལ་གསོ།
འཇུ་ཏ།	ལྷམ།
ཇོ་ལ།	བདོག་ཕད།
པག་ཀ	ལེགས་ཞིམ།
པཱང་ཁ།	རླུང་འཁོར།
པུ་ར།	ག་ར། ཆ་མཉམ།
བྷ་ཛར།	ཁྲོམ།
བྷ་བཏེག	ས་བཏེག
བྷཱསི།	མི་མང་འགྲུལ་འཁོར།
བྷནཱ་ཀི།	དུ་མ།
བྷི་ཇཱིལ།	གློག་མེ།
མཱ་ལིག	ཇོ་བདག
མོ་ཊེ།	རྒྱགས་ཏོ་རིལ་རི། འཕེལ་ཏོ་རིལ་རི།
ལམ་བྷུག	རིངམོ།
སཱབ་ཇི།	ཚོད་བསྲེ།
ཧབ་ཐེ།	བདུན་ཕྲག

རྒྱལ་ཡོངས་སྐད་ཡིག་གི་མིང་ཚིག་དར་ཁྱབ་གཏང་མ་ཚུགས་པའི་རྒྱུ་རྐྱེན་འདི་ མིང་ཚིག་གཞན་མི་ཚུ་གིས་ དེའི་ཁྱད་ཆོདཔ་སྦེ་སླབ་ནི་འདི་གིས་ཨིན་པས།