ཀ་དང་འབྲེལ་བའི་དཔྱེ་གཏམ་གྱི་རིགས།

1. ཀ་ཁ་ག་ང་ང་གིས་མི་ཤེས།། བཀའ་འགྱུར་བསྟན་འགྱུར་ཐ་ར་ར།།
2. རྐངམ་གཅིག་ནང་དང་། །རྐངམ་གཅིག་ཕྱི་ཨིན་པས།
3. རྐངམ་ཕར་ཁར་དཔྱང་། །ཉིམ་ཚུར་ཁར་བསྲོ། །
4. དཀའཝ་མ་སྤྱདནི་འབྲས་བུ་མི་འཐོབ།
5. དཀར་གནག་གནམ་བྱཱར་གྱི་གློག་ཀེམ་དེས་ཀེམ།།
6. དཀོན་མཆོག་མཆོད་པ་བདག་མི་ཕམ།
7. ཀོཝ་ཉི་མའི་དྲོད་དང་བསྟུན་ཏེ་འཕུ།
8. སྐོམ་རུང་སྨྱོ་ཆང་མ་འཐུང་། །སྡུག་རུང་ཕ་གཞིས་མ་བཙོང་། །
9. སྐྱོམ་མེདནི་རྟ་རྒས་ཉོ། །སྐྱོམ་རྟ་རྒས་ཀྱིས་འབག་ནུག །
10. སྐྱིདནི་གནམ་མཁའི་བྱ་ཡང་འཁོར།།སྡུགནི་མཆན་གྱི་བུ་ཡང་སྤང་།།

ཕགཔ་དང་འབྲེལ་བའི་དཔྱེ་གཏམ་གྱི་རིགས།

རྫོང་ཁ་སླབ་ཐངས་སྡེ་ཚན་གྱིས་ མི་སྡེའི་བརྡ་བརྒྱུད་ཝི་ཅེཌ་ཀྱི་ཐོག་ལུ་  དང་ཕུ་དིང་ཕུ་ལས་སླབ་སྲོལ་ཡོད་པའི་དཔྱེ་གཏམ་ཚུ་ སྲུང་བཟུམ་ཅིག་སྦེ་བཞག་མ་ད་པ་ སྟག་ཤི་རུང་ དོམ་རོ་ལོངས།།ཟེར་བའི་དཔེ་བཟུམ་སྦེ་ ཕམ་རྒས་ཤོས་ཚུ་ཁ་ས་ཡིས་བཅད་ཆི་རུང་ ད་ལྟོ་རྒས་གཞོན་རན་ཏོག་ཏོ་སྦེ་སྡོད་མི་ཆ་ཁྱབ་ཀྱིས་ དེ་བསྒང་བསོད་ནམས་ཅན་གྱི་ཕམ་ཚུ་གིས་སླབ་ས་གོ་མི་ཚུ་ ནང་ཁོག་པའི་ཧིང་ལུ་རུལ་མ་བཅུག་པར་ ཞར་ཞོར་དར་ཁྱབ་གཏང་ནི་དང་། རྟིང་མ་བུ་གཞི་ཚུ་གི་མཐའ་དོན་ལུ་བདོག་གཏད་སྦེ་བཞག་ནིའི་ཐབས་ལམ་ཅིག་ལཱ་ཁག་སྦེ་འཚོལ་མི་དགོ་པར་ མི་སྡེའི་བརྡ་བརྒྱུད་ཐོག་ལུ་འཇམ་ཏོང་ཏོ་སྦེ་ སྟབས་བདེའི་ཞིབ་འཚོལ་འབད་ཚུགས་པའི་ལམ་ཅིག་འདུག་ཟེར་མནོ་སྟེ་ ད་རེས་ཉིནམ་༢ཀྱི་རིང་ དོན་ཚན་ སྒོ་ནོར་སེམས་ཅན་ཕགཔ་དང་འབྲེལ་བའི་ དཔྱེ་གཏམ་གསུང་གྲོས་གནང་པའི་བསྒང་ཡོདཔ་ལས་ ནཱ་བཞུགས་མི་མཁས་པ་ཚུ་གིས་ ལྟག་གི་དོན་ཚན་དང་འབྲེལ་བའི་དཔྱེ་གཏམ་རེ་འབྲི་སྟེ་བཀའ་དྲིན་བསྐྱང་གནང་ཞུ་ནི་ཨིན།།

ལཱ་སྐོར།

རྫོང་ཁ་སླབ་ཐངས་གྲོས་བསྟུན་ཞབས་ཏོག་ལས་སྡེ་འདི་ ཧེ་མ་རྫོང་ཁ་སླབ་ཐངས་སྡེ་ཚན་སྦེ་འགོ་བཙུགས་ཞིནམ་ལས་ ལོ་ངོ་མང་རབས་ཅིག་གི་རིང་ལུ་ དང་ཕུ་དུས་རྒྱས་ཀྱི་རྫོང་ཁའི་མིང་ཚིག་ཐང་མེདཔ་ཅིག་གུར་ གསུང་གྲོས་མནོ་མནོཝ་ཅིག་གནང་ཡི། 

རྫོང་ཁའི་ཡིག་སྡེབ་ཅོག་འཐདཔ་སྦེ་འབྲི་དགོཔ།

རྫོང་ཁ་གོང་འཕེལ་ལྷན་ཚོགས་ཀྱི་ མཁས་ཚོགས་ཞལ་འཛོམས་ཐེངས་༢པའི་ནང་ བརྡ་བརྒྱུད་ལས་ཁང་ཚུ་དང་ གཞན་རྫོང་ཁ་ལག་ལེན་འཐབ་མི་ཆ་ཁྱབ་ཀྱིས་ རྫོང་ཁའི་ཡིག་སྡེབ་གཅིག་མཚུངས་འབྲི་དགོཔ་སྦེ་ཐག་བཅད་ཡོད་པའི་འདྲ་བཤུས་ངོ་མ་འོག་ལུ་ཡོད།

ཡིགུ་དང་རྗོད་སྒྲ་གཅིག་མཚུངས།

༉ དཔལ་འབྲུག་པ་རིན་པོ་ཆེ་ཞབས་དྲུང་ངག་དབང་རྣམ་རྒྱལ་མཆོག་ ཨོ་རྒྱན་རིན་པོ་ཆེའི་ལུང་བསྟན་དང་ ཆོས་སྐྱོང་དཔལ་ཡེ་ཤེས་མགོན་པོས་སྡོང་གྲོགས་མཛད་དེ་ སྨན་ལྗོངས་རྒྱལ་ཁབ་ནང་བྱོན་ཞིནམ་ལས་ ཐེད་ཐིམ་གཉིས་ཀྱི་ས་གནས་ནང་ ཆོས་སྲིད་ལུགས་གཉིས་ཀྱི་གཞུང་སྐྱོང་ལྟེ་བ་གཞི་བཙུགས་གནང་བའི་སྐབས་ ལུང་ཕྱོགས་ནང་ཧེ་མ་ལས་སླབ་སྲོལ་ཡོད་པའི་ཁ་སྐད་འདི་ གཞུང་འབྲེལ་གྱི་སྐད་ཡིག་སྦེ་ངོས་འཛིན་གནང་ནུག

དེའི་ཤུལ་མ་ བཀའ་དྲིན་ཅན་གྱི་མངའ་བདག་མི་དབང་འཇིགས་མེད་རྡོ་རྗེ་དབང་ཕྱུག་མཆོག་གི་ཐུགས་ཀྱི་དགོངས་དང་ རྒྱལ་སྤྱིའི་འགྲོ་ལུགས་དང་བསྟུན་ཏེ་ འབྲུག་གི་རྒྱལ་ཡོངས་ཁ་སྐད་རྫོང་ཁ་དེ་ཡང་ བརྡ་སྦྱོར་རིག་པའི་རྣམ་གཞག་ལས་མ་འགལཝ་ཅིག་སྦེ་ ཚད་ལྡན་གྱི་སྐད་ཡིག་ཅིག་སྦེ་དར་ཁྱབ་གཏང་ནིའི་དོན་ལུ་ རྫོང་ཁ་ཞུང་རྐྱང་རྐྱབ་མི་ཚུ་དང་འབྲེལ་བ་འཐབ་སྟེ་ མིང་ཚིག་ཡིག་ཐོག་ལུ་འབྲི་ནི་འགོ་བཙུགས་གནང་ནུག

ཨིན་རུང་དེའི་སྐབས་ རྫོང་ཁ་ལྕེ་མཆུ་དག་དྲག་སྦེ་སླབ་མི་ཚུ་དང་ཕྱད་མ་ཚུགསཔ་ད་ ཡངནི་ཡིག་ཐོག་ལུ་བཀོད་མི་ཚུ་གིས་ རང་སོའི་གཡུས་སྐད་ཀྱིས་ཤན་ཞུགས་ཏེ་ ཁ་ལས་སླབ་མི་འདི་ ཡིག་ཐོག་ལུ་བཀོདཔ་ད་ དག་ཆ་བཏོན་མ་ཚུགས་ནི་འདི་གིས་ ད་རིས་ནངས་པ་ཚིག་མཛོད་དང་ དཔེ་དེབ་མང་ཤོས་ཅིག་ནང་ ཡིགུ་ནང་ག་ཡོད་མི་འདི་ལྷག་པ་ཅིན་ རྗོད་སྒྲ་མ་དག་པའི་སྐྱོན་སྦོམ་འདུག

མ་གཞི་ ལ་ལུ་ཅིག་གིས་ ཡིག་ཐོག་ལུ་འབྲི་མི་དང་ཁ་ལས་སླབ་མི་གཉིས་ དབྱེ་བ་ཡོདཔ་སྦེ་ཁུངས་བཀལ་དོ་ཡོད་རུང་ སྐད་ཡིག་མཁས་མཆོག་ཚུ་གིས་འབད་བ་ཅིན་ ཡིགུ་དང་རྗོད་སྒྲ་མ་འདྲཝ་སྦེ་བཏོན་དགོ་པའི་ མིང་ཚིག་གྱངས་ཁ་ཆོདཔ་ཅིག་མ་གཏོགས་ གཞན་ཚུ་ཡིགུ་དང་འཁྲིལ་ཏེ་རྗོད་སྒྲ་བཏོན་དགོ་ཟེར་ཨིན་པས། རྒྱུ་མཚན་དེ་ཚུ་ལུ་བརྟེན་ཏེ་ སྐད་ཡིག་གཉིས་པ་སྟོན་མི་སློབ་དཔོན་ཚུ་ལུ་སྟབས་མ་བདེཝ་མེད་རུང་ ཕ་མའི་ཁ་སྐད་རྫོང་ཁ་རྐྱབ་མི་སློབ་དཔོན་ཚུ་ དཔེ་ཆ་སྟོནམ་ད་མགུ་འཐོམས་ཏེ་ཡོདཔ་ཨིན་པས།དཔེ་འབད་བ་ཅིན་ འབུང་གཏང་། འབུང་གམ།ཟེར་མི་ཚུ་སྔོན་འཇུག་མེད་པ་ཅིན་རྗོད་སྒྲ་ བུང་གཏང་། བུང་གམ།ཟེར་འཐོན་དོ་ཡོད་ནི་འདི་གིས་ གོ་བརྡ་འཛོལ་ནིའི་ཉེན་ཁ་སྦོམ་ཡོདཔ་ལས་ སྐྱོན་སྦོམ་ཤོས་ཅིག་སྦེ་བརྩིཝ་ཨིན་རུང་ ལ་ལུ་ཅིག་གིས་སྔོན་འཇུག་ཡོད་རུང་མེད་རུང་ རྗོད་སྒྲ་ཅོག་འཐདཔ་སྦེ་འཐོནམ་ཨིན་ཟེར་སྣང་དག་མེད་ནི་འདི་གིས་ རྗོད་སྒྲ་དག་ཏོག་ཏོ་དང་ ཡིག་སྡེབ་གཅིག་སྦེ་འབྲི་ནི་ལུ་ ལུ་ལཱ་ཁག་བཏངམ་ཨིན་པས།

མཇལཝ་མས་ཟེར་མི་ལུ་དཔྱད་པ།

འབྲུག་ལུ་ད་རིས་ནངས་པ་ ཆེ་མཐོའི་ཞལ་འཛོམས་གནང་སར་དང་ མི་དམངས་འཛོམས་འདུ་རྐྱབ་སར་ བརྡ་བརྒྱུད་ནང་  གསལ་བཤད་འབད་མི་ཚུ་གིས་ཡང་ ཕོག་ལམ་དང་མ་འཁྲིལ་པའི་ཚིག་མཇལཝ་མས་ཟེར་མི་འདི་ ལོག་ཅི་ལོག་ཅི་ར་སླབ་སྲོལ་ཡོད་མི་འདི་ ན་འཐན་སྦེ་དབྱེ་བ་དཔྱད་ལྟཝ་ད་ ལ་ལུ་ཅིག་གིས་ ཨིན་ཅི་མིན་ཅི་བློའི་བར་ན་ཚིག་དེ་སྦེ་བཙུགས་ཏེ་སླབ་དགོཔ་འདྲས་མནོ་སྟེ་ རོགས་ཀྱིས་སླབ་པས་ཟེར་དཔེ་ལྟ་སྟེ་ ལས་ཀྱིས་ར་དར་ཁྱབ་གཏངམ་ཨིན་པས།

མ་གཞི་མཇལཝ་མས་ཟེར་མི་ཚིག་སླབ་ནི་འདི་གིས་ རྒྱལ་ཁབ་ལུ་གནོད་པ་དང་ མ་བཏུབ་སྦོམ་ཅིག་ག་ནེ་ཡང་མེད་རུང་ རྒྱལ་ཡོངས་སྐད་ཡིག་དར་ཁྱབ་གཏང་པའི་ནམ་དུས་ལུ་ མིང་ཚིག་ཚུ་ཕོག་ལམ་དང་འཁྲིལ་ཏེ་མིན་པར་ ག་ཚུད་གུ་ཚུད་སྦེ་སླབ་པ་ཅིན་ གཞོན་སྐྱེས་ཚུ་གིས་དཔེ་བལྟ་སྟེ་ མཇུག་ལས་མཇུག་སུ་ རྫོང་ཁ་མ་དགཔ་འགྱོ་ནིའི་ཉེན་ཁ་སྦོམ་འདུག

ད་ལྟོའི་སྐབས་ལུ་ མཇལཝ་མས་ཟེར་མིའི་ཚིག་འདི་ བར་ན་ག་དེ་སྦེ་བཙུགས་ཏེ་སླབ་དོ་ཡོདཔ་ཨིན་ན་ དཔེ་ཅིག་འོག་ལུ་བཀོད་དེ་ཡོད།

༡ ད་རིས་ནངས་པ་ཁྲོམ་ཁར་ ན་གཞོན་ཚུ་གིས་ སྨྱོ་རྫས་ལག་ལེན་འཐབ་སར་མཇལཝ་མས། 

༢ ཁྲོམ་ཁར་སྣུམ་འཁོར་ལམ་ཧོ་ག་འཐོན་ཏེ་ཡོདཔ་སྦེ་མཇལ་ཡི།

༣ ནཱ་གིས་དམངས་ཁར་དེ་སྦེ་ཞུ་དགོཔ་ཅིག་མ་མཇལ།

དེ་བཟུམ་གྱི་ཚིག་ཐང་མེདཔ་ཅིག་ཡོད་རུང་ ཡིགུ་མང་པས་ཟེར་མནོ་སྟེ་དཔེ་ཅིག་ལས་བརྒལ་མ་བཀོད། གཞན་དལ་གཞིར་ ༡༽ན་གཞོན་ཚུ་གིས་ སྨྱོ་རྫས་ལག་ལེན་འཐབ་སར་མཐོང་ཅི། ༢༽ ཁྲོམ་ཁར་སྣུམ་འཁོར་ལམ་ཧོ་ག་འཐོན་ཏེ་འདུག ག་ར་གིས་མཐོང་མཐོངམ་འོང་། ཡང་ཅིན་གཟིགས་གཟིགསཔ་འོང་། ༣༽ ནཱ་གིས་དམངས་ཁར་དེ་སྦེ་ཞུ་དགོཔ་ཅིག་མི་ནུག ཡང་ཅིན་ཞུ་དགོཔ་མེད་ཟེར་ རྫོང་ཁའི་ཚིག་སླབ་དགོ་བདེ་ཏོག་ཏོ་མང་ཧེད་རྫོགསཔ་ཅིག་ཡོད་རུང་ ལཱ་ཁག་བཅུ་གསུམ་བཟོ་སྟེ་ བགོད་བྲ་སི་སི་སྦེ་སླབ་ནི་སྤང་དགོཔ་འདུག་ཟེར་མནོཝ་མས།

གསོལ་ཐབ་བྱོན་སའི་ས་གནས་ཀྱི་མིང་།

༉  རྫོང་གཞིས་ཕན་ཚུན་གཉིས་ལུ་ གསོལ་ཐབ་ཕར་ཚུར་བྱོན་པའི་སྐབས་ཀྱི་ ས་གནས་ཁག་གི་མིང་། བཀྲ་ཤིས་ཆོས་རྫོང་། ཐ་བྲག་གླིང་ཤིང་རྩ་བ། ལྕང་གླིང་མའི་ཐང་། ལུང་བསྟན་ཟམ་པ། ས་དམར་རྫིང་ཁ། ཅང་ལུང་སྟོད། རུས་ཆད་ལྷ་ཁང་། སེམས་རྟོགས་ཁ། མེ་མདའ་སྤོ་ཏོ། འོད་གསལ་སྤང་། ལྷུང་ཚོ་ཀུན་ར། གླ་ཀོང་བཙིག་ཀོང་། རྡོ་ཀྱོང་གསེར་གྱི་ཐང་། སྡོང་སྦོ་བ། རྡོ་ཀྱོང་ལ། བླམ་དཔལ་རི། རྡོ་ཀྱོང་གསེར་གྱི་གཟར་ཅུང་། རྡོ་ཀྱོང་གསེར་གྱི་གཞོངམ། སྟགམོ་ཞོབ་ས། ཚ་རྡོ་སྤེག་ས། རྨ་བྱ་འཁྱམ་ས། སྤང་དབང་ཁ། ལུང་པའི་མགུ། ལྕམ་ཟེར་སྤང་། ལྕམ་ཟེར་ན། ཕན་ཙི་རི་ལུངམ། ཕྲིན་ལས་སྒང་། མཆོད་རྟེན་སྒང་། ལུང་འགྱམ་གོང་མ། ཕྱག་མདའ་ཟམ། ཕྱག་མདའ་ན། སྦུལ་མེད་རྐེད་པར་བཏོག་ས། འཕེལ་བ་རྡོ་ལེབ། གསོལཝ་དྲང་ས། དགོན་ཅུང་ན། དར་འཕྱར་སྒང་། ཕྱག་འཚལ་མཆོད་རྟེན། རྟ་བབ་མཆོད་རྟེན། མོ་ཆུ་ཕར་ཀ དར་ཤིང་རྩ་བ། སྤུངས་ཐང་རྫོང་།

དྲན་གསོ། 

ལྟག་ལུ་བྲིས་ཡོད་པའི་ས་གནས་ཁག་གི་མིང་ཚུ་  མཐའ་དཔྱད་ཀྱི་ཞུ་དག་འབད་འབདཝ་མེནམ་ལས་ ཐུགས་རྒྱུས་ཡོད་མི་ཆ་ཁྱབ་ཀྱིས་བཅོ་ཁ་རྐྱབ་སྟེ་བཀའ་དྲིན་བསྐྱང་གནང་།