ཚ་ཆུ་ཕུའི་ས་གནས་ཁག་གི་མིང་གནས་བྱུང་ཚུལ།

སྤུ་ན་ཁ་ཆུ་ཕུ་ཚ་ཆུའི་གནས་བདག་མཁར་ཆེན་གྱི་རྒྱབ་ཁུངས།

ཨོ་རྒྱན་རིན་པོ་ཆེ་དང་ དཔལ་ཡེ་ཤེས་མགོན་པོའི་ལུང་བསྟན་དུས་ལུ་བབས་ཏེ་ དཔལ་འབྲུག་པ་རིན་པོ་ཆེ་ཞབས་དྲུང་ངག་དབང་རྣམ་རྒྱལ་གྱིས་ སྤུངས་ཐང་བདེ་བ་ཆེན་པོའི་ཕོ་བྲང་བཞེང་པའི་སྐབས་ གནས་བདག་གཞི་བདག་ཚུ་གིས་ རང་སོའི་ས་ཁོངས་ལས་བཅད་དེ་ ཕྱག་ཕྱིད་ཞུ་ནིའི་ཁས་བླངས་ཕུལ་བའི་སྐབས་ ཚ་ཆུ་ཕུ་གི་གནས་བདག་མཁར་ཆེན་གྱིས་ ས་ཁོངས་འདི་ ནགས་བཟང་ས་འབད་ནི་འདི་གིས་ ཅན་ལྡན། ཁ་ཤིང་། མཚན་ལྡན། སྟར་ཤིང་གི་རིགས་རྒྱགས་ཚད་ཡོདཔ་ལས་ ཤིང་གི་གཏེར་ཁ་ཕུལ་ནིའི་ཁས་བླངས་ཕུལ་ཏེ་ ཤིང་ཆས་ག་དེ་ཅིག་ ཕོ་ཆུ་བདའ་སྟེ་བསྐྱལ་བཏང་རུང་ རྫོང་བཞེང་ས་ལས་ ཤིང་ལང་པའི་བརྡ་ལན་ལྷོད་ནི་མེདཔ་ལས་ གནས་བདག་མཁར་ཆེན་གྱིས་ ལངམ་སྦྱིམ་སྒང་གི་ཟུར་ཁ་ལས་ རྫོང་བཞེང་སའི་ས་ཁོངས་ནང་གཡིབ་སྟེ་གཟིགསཔ་ ཞལ་ཕྱེད་ཀ་ཧོནམ་དང་ ཕྱེད་དཀརཔོ་སྦེ་བསྒྱུར་ཡར་སོངམ་མ་ཚད་ ཁ་ཆེ་སར་ཆད་སོང་ནི་འདི་གིས་ གནས་བདག་གི་མཚན་ཡང་ཁ་ཆདཔ་ཟེར་སླབ་ཨིནམ་སྦེ་ཁུངས་བཀལཝ་ཨིན་རུང་ གནས་པོའི་གསོལ་ཁ་ནང་ མཁར་ཆེན་དགྲ་ལྷ་ཡི་རྒྱལ་པོ་ཟེར་གསལ་ཏོག་ཏོ་སྦེ་བཀོད་དེ་ཡོད་ནི་འདི་གིས་ དེ་བ་ལྷག་པའི་བདེན་ཁུངས་བརྫངས་དགོཔ་མི་ནུག་ཟེར་མནོཝ་མས།

སྐྱེལ་པའི་ལོག 

ཆུ་ཕུ་ཚ་ཆུའི་གནས་བདག་གིས་ ཧེ་མའི་ཁ་ཚིག་དང་འཁྲིལ་ཏེ་ ཤིང་ཆས་ཕུལ་མ་བཏུབ་ཟེར་ སྤུངས་རྫོང་པའི་དམག་ཚུ་གིས་ དཔའ་རྟགས་གནམ་ཁར་འཕྱར། དགྲ་ལི་རླུང་ལུ་བསྐྱེལ། མེ་མདའ་པག་ཆེན་གྱི་འུར་སྒྲ་དང་བཅསཔ་སྦེ་ གནས་བདག་མཁར་ཆེན་བདའ་སྟེ་ ད་ལྟོ་བསྐྱེལ་པའི་ལོག་གཡུས་ཚན་ནང་དམག་འཐབ་པའི་ཤུལ་ལུ་ སྤུངས་རྫོང་པའི་དམག་ཚུ་ལོག་ཡར་སོ་ནི་འདི་གིས་ ས་ཁོངས་ཀྱི་མིང་ཡང་ལོག་པའི་ཐང་ཟེར་སླབ་ཨིནམ་སྦེ་བདེན་ཁུངས་བརྫངས་ནི་འདུག

ད་རུང་རྟིང་མ་སྤུངས་རྫོང་པའི་དམག་ཚུ་ ཚ་ཆུ་ཕུ་ལུ་འོངམ་ད་ གནས་བདག་མཁར་ཆེན་གྱིས་རྫུ་འཕྲུལ་བསྟན་ཏེ་ ལམ་ལྟག་ལས་ སྡེཔ་གུ་ལྕགས་སྐྱུར་ཏེ་དམག་རྐྱབ་སྟེ་འབད་རུང་ ལོག་རྟིང་མ་ སྤུངས་ཐང་རྫོང་གི་དོན་ལུ་ཤིང་ཆས་ཕུལ་ཡོདཔ་ཨིན་པས། ས་གནས་འདི་ནང་ ལམ་ལྟག་ལས་མར་རྡོ་བུད་འོང་སག་ས་སྦེ་ཡོད་མི་དང་ ཕྱག་བཤེད་རྡོ་གུ་བླུགས་པའི་གྲམ། ཆིབས་ཀྱི་ཆག་ཟ་སའི་ཤུལ་ཚུ་གསལ་ཏོག་ཏོ་སྦེ་ ད་ལྟོ་བར་ན་མཇལ་ནི་ཡོདཔ་ཨིན་པས།

བྱལ་སྒང་གི་རྒྱབ་ཁུངས།

ཤར་ཀ་གཞི་ལས་ མ་རྡོག་གཅིག་ལུ་བུ་རྡོག་གཅིག་ཨིན་མི་དོན་གྲུབ་ཟེར་ སྐྱེས་རིགཔ་བཟང་དྲགས་ཡོད་མི་འདི་ ཆུ་ཕུ་ཚ་ཆུ་ལྷོདཔ་ད་ གནས་བདག་མཁར་ཆེན་ལུ་གསོལ་ཁ་དང་ སྙན་གསོལ་ཕུལ་ཞིནམ་ལས་ ཆོས་རྒྱལ་དྲི་མེད་ཀུན་ལྡན་ ཐར་བཤུད་དཀའ་སྤྱད་གནང་སའི་རིའི་སྤྱི་ཏོ་གུ་ སྡོ་ཉམས་སྤྲོ་ནི་མས་ཟེར་ ག་གིས་བསྒོར་རུང་བསྒོར་མ་ཚུགས་པ་རྒྱབ་ཐལ་བའི་ཤུལ་ལུ་ རིའི་རྩེ་མོ་ལས་དུ་པ་བཏང་སར་ ཚ་ཆུ་སྡོད་མི་ཚུ་གིས་མཐོང་རུང་ ལོག་འོང་ནི་མེད་པར་ཡུན་རིངམ་ཡར་སོངཔ་ལས་ ཕམ་སྤུན་ཆ་ཚུ་སྔུམ་རལམ་འཐབ་སྟེ་ ཉིན་ནུབ་བདའ་སྦྱེལ་འཚོལ་རུང་མ་ཐོབ་པས། ཨིན་རུང་ཚར་གཅིག་འབདཝ་ད་ ཨའི་དང་ཕྱད་པར་འོང་སྟེ་ ང་བཅས་མ་སྨད་གཉིས་ཚེ་འདི་ལུ་ཕྱད་པའི་མཇུག་ད་རིས་ཨིན་པས། ང་ས་གནས་འདི་ཁ་ལས་བརྒལ་ཏེ་འགྱོ་མི་ཆོག་པའི་དམ་བཅའ་ཡོད་ཟེར་སླབ་ཞིནམ་ལས་ བང་ཅུང་ཁ་བཅད་བཅདཔ་ཅིག་ཨའི་ལུ་སྤྲོད་དེ་ ཞག་གསུམ་མ་ལང་ཚུན་ཁ་མ་ཕྱེ། ཞག་གསུམ་གྱི་རྟིང་མར་ཁ་ཕྱེ་བལྟ་ཟེར་སླབ་འབད་སྦེ་ མ་སྨད་གཉིས་ཁ་གྱེས་ཡར་སོང་ནུག དེ་ལས་ཨའི་གིས་ ཞག་གསུམ་གྱི་ཤུལ་ལས་བང་ཅུང་ཁ་ཕྱེ་སྟེ་ལྟཝ་ད་ དེའི་ནང་ན་ གཡུ། བྱུ་རུ། མུ་ཏིག ནོར་བུའི་བྱེ་བྲག་ཐང་མེདཔ་ཅིག་ཡོད་ནི་འདི་གིས་ ཁོང་བཟའ་ཚང་ཚུ་ཕྱུགཔོ་འདོད་དྲགས་ཅིག་ལུ་འགྱུར་སོ་ནུག ས་དབྱིབ་སྒང་དང་མ་སྨད་གཉིས་ཁ་བྱལ་ས་འབད་ནི་འདི་གིས་ ས་གནས་ཀྱི་མིང་ཡང་བྱལ་སྒང་ཟེར་སྲོལ་བྱུང་རུང་ ཤུལ་ལས་མིང་གི་ཟུར་ཉམས་ཏེ་ བྱལ་སྐད་སྒང་ཟེར་དར་ཁྱབ་སོང་ནུག

དེ་གིས་ཡང་མ་དོ་བར་ རོ་པའི་མགོ་སྐྱེས་ཞྭརཝ། ཤར་གྱི་ཨ་ལུ་དཔལ་འབྱོར་ཟེར་མི་ཚུ་ཡང་ གནས་བདག་མཁར་ཆེན་གྱི་འཁོར་སྦེ་ཚུད་དེ་ཡོདཔ་ཨིན་པས།

བུམ་ལྟག་ཁ་མིང་བཏགས་དགོ་པའི་ཁུངས།

མཁར་ཆེན་གྱི་གནས་ཁང་གི་སྒོ་ར་སྒོ་དང་པ་འདི་ ལངམ་སྦྱིས་སྒང་ལུ་ཨིནམ་མ་ཚད་ གཉིསཔ་འདི་བུམ་ལྟང་ཁར་ཨིན་པས། ས་ཁོངས་བུམ་པའི་དབྱིབས་བཟུམ་སྦེ་ཡོད་པའི་ལྟག་ལུ་འབད་ནི་འདི་གིས་ ས་གནས་ཀྱི་མིང་ཡང་བུམ་ལྟག་ཁ་ཟེར་སླབ་ཨིན་པས། ས་ཁོངས་དེ་ཡར་བཅད་ཀྱི་མི་སེར་ཚུ་ ཆུ་ཕུ་ཚ་ཆུ་ལུ་འགྱོཝ་ད་ ཕྱོགས་ཕོག་མི་ཕོག་བལྟ་མི་དགོཔ་ཨིན་པས།

སྐྱེལ་པའི་ལོག་ཟེར་བའི་མིང་གནས་བྱུང་ཚུལ།

ཆོས་རྒྱལ་དྲི་མེད་ཀུན་ལྡན་གྱི་ཞབས་སྐྱེལ་འོང་མི་ཚུ་ ས་གནས་དེ་ཁ་ལས་ལོག་ རྒྱ་གར་ནང་སོང་ནི་འདི་གིས་ ས་ཁོངས་ཀྱི་མིང་ཡང་སྐྱེལ་པའི་ལོག་ཟེར་སླབ་སྲོལ་བྱུང་ནུག

སླབ་སྲོལ་གཞན་ཅིག་ལས་ ཆོས་རྗེ་འབྲུག་པ་ཀུན་ལེགས་མཆོག་ ཚ་ཆུ་ཕུ་ཁ་ཐུག་ལུ་ཞབས་སྐོར་ལུ་བྱོནམ་ད་ གཡུས་ཚན་འདི་ནང་གི་མི་སེར་ཚུ་གིས་ བློ་ཕོག་ཡིད་ཕོག་སྦེ་ ཆོས་རྗེ་རིན་པོ་ཆེ་ལུ་ ཆབ་ཆུ་འབོལ་ཚད་མེདཔ་སྦེ་དྲང་ནི་འདི་གིས་ གནམ་མེད་ས་མེད་ཐུགས་དགྱེས་ཏེ་ ཁྱིམ་འདི་ནང་འདོད་ཡོན་གྱི་བསྐལཔ་ཆགས་ནུག་ཟེར་གསུངས་ཞིནམ་ལས་ ཡ་གི་ས་གནས་ནང་བྱཱ་འཚོ་ག་མི་འཚོ་ལྟ་གེ་ཟེར་ ཞལ་ཆུ་ཕུ་ཚ་ཆུ་ཁ་ཐུག་ལུ་བསྒོར་ཏེ་ ཐུགས་སྨོན་གནང་ཞིནམ་ལས་ ཕྱག་འབྲུ་སྟོར་གནངམ་ད་ འབྲུ་ཕུད་རྡོག་གསུམ་འབད་མི་ཅིག་ཧུམ་པ་ཐང་གི་ལྟག་ རྡོག་ཕུག་གཅིག་གུ་ཆགས་པའི་རྟེན་འབྲེལ་གྱིས་ གཡུས་ཚན་འདི་ས་ཁ་མཐོ་སུ་ཅིག་ཨིན་རུང་ བྱཱ་འཚོཔ་མ་ཚད་ ད་རིས་ནངས་པ་ཡང་རྡོག་ཕུག་གུ་བྱཱ་བོང་ཁོགས་གསུམ་ཡ་མཚན་ཆེ་ཏོག་ཏོ་སྦེ་སྐྱེས་ཏེ་ཡོདཔ་ཨིན་པས། ཆོས་རྗེ་རིན་པོ་ཆེ་གིས་ ཁྱིམ་འདི་ནང་འདོད་ཡོན་གྱི་བསྐལཔ་ཆགས་ནུག་ཟེར་གསུངསམ་མ་ཚད་ ས་ཁོངས་འདི་ཁ་ལས་ ལོག་སྤུངས་ཁ་ཐང་ཁ་ཐུག་བྱོན་ནི་འདི་གིས་ ས་གནས་ཀྱི་མིང་བསྐལ་པའི་ལོག་ཟེར་དར་ཁྱབ་སོང་ནུག

རྟ་མི་ཨ་ལུ་ཟ་ས།

ཧེ་མའི་དུས་ལུ་ རྟ་མི་འདམ་ཆིའི་ཨམ་སྲུ་ཚུ་གིས་ ཨ་ལུ་ག་དེམ་ཅིག་སྐྱེས་རུང་ མི་གསོ་དོ་ཡོདཔ་ལས་ གཡུས་ཁའི་མི་ཚུ་གྱོས་སྐོར་བསྡུ་སྟེ་ ག་ཅི་གིས་གཡོ་འཕྲུལ་ཅིག་ཨིན་ན་ཟེར་ཐུགས་བརྟག་ཞུཝ་ད། གཡུས་ཚན་གྱི་གདོང་ཕྱོགས་ལུ་ བྱག་གུ་སྲིན་པོའི་གཟུགས་བརྙན་ཡོད་ནི་འདི་གིས་ཨིནམ་ལས་ གཡུས་མི་ཚུ་གིས་ སྲིན་པོའི་མཆེཝ་གི་ཚུལ་སྦེ་ཡོད་མི་རྡོ་སྤོག་བཀོ་ཞིན་ན་ལས་ཚུར་ ཧེ་མ་བཟུམ་སྦེ་གནོད་རྐྱེན་མ་བྱུངམ་པས་བཤདཔ་ཨིན་པས།

མཁར་ཆེན་པའི་མར་ཁུ་བཙིར་ས།

གནས་བདག་མཁར་ཆེན་གྱི་ མར་ཁུ་བཙིར་ས་ཨིན་ཟེར་ རྡོ་ཕུག་ཅིག་ཡོད་མི་འདི་ ཚོས་གཞི་སྨུག་ཙིག་ཙི་ཧུམ་ཆོབ་ཆོ་སྦེ་ཡོད་པ་ཅིན་ གཡུས་ཁར་སྤང་ཙི་ལོ་ལེགས་པའི་རྟགས་དང་ གནས་རྡོ་འདི་ཐལ་ཁོགས་རི་རི་ཨིན་པ་ཅིན་ སྤང་ཙི་ལོ་མི་ལེགསཔ་སྦེ་ཡིད་ཆེས་བསྐྱེདཔ་ཨིན་པས།

ཁུངས་སྐྱེལ་མི་ རྫོང་ཁ་སླབ་ཐངས་སྡེ་ཚན་གྱི་ཚོགས་ཆུང་གི་འཐུས་མི་ ཆེད་བསྟོད་ཅན་གྱི་འཐུས་མི་བགྲེསཔ་རྣམ་རྒྱལ་དབང་ཕྱུག་ཨིན། ཨིན་རུང་ཝི་ཅེཊ་སྡེ་ཚན་ནང་ཉན་ཏེ་ བྲིས་བྲིསཝ་འབད་ནི་འདི་གིས་ དུམ་གྲ་རེ་ལྷག་ཆད་ཞུགས་ཞུགསཔ་འོང་། དེ་འབད་ནི་འདི་གིས་ ཟིན་བྲིས་ཨིན་པའི་ཐུགས་བཞེད་གནང་སྟེ་ ཧེང་སྐལ་ཁུངས་སྐྱེལ་ནི་དང་ བཅོ་ཁ་རྐྱབ་དགོཔ་ཡོད་པ་ཅིན་ དེ་འཕྲལ་ལས་གསུངས་གནང་ལགས།

download Important of our national language

དེ་བསྒང་གི་སླབ་སྲོལ་ལུ་གཙོ་བོར་བཏོན་དགོཔ།

༉ འབྲུག་རྒྱལ་ཁབ་ནང་ དེ་བསྒང་ཕ་མའི་ངོ་བསྒང་སླབ་སྲོལ་ཡོད་པའི་ཁ་སྐད་རྫོང་ཁ་འདི་ ཧེ་མ་ག་སླབ་དོཝ་བཟུམ་སྦེ་ ད་རེས་ནངས་པ་སླབ་ནི་མེད་མི་འདི་ དུས་དང་བསྟུན་ཏེ་མིང་ཚིག་གསརཔ་བཟོ་མི་དང་ ཨིང་སྐད་ལས་སྐད་སྒྱུར་འབད་ཡོད་བའི་ཚིག འགོ་མཇུག་སློག་སློག་པའི་མིང་ཚིག་ཚུ་ མགྱོགས་དྲགས་སྦེ་དར་ཁྱབ་འགྱོ་མི་འདི་གིས་ རྒྱལ་ཁབ་ཀྱི་རང་དབང་སྲུང་སྐྱོབས་དང་ འབྲུག་པའི་ལུགས་སྲོལ་ རྒྱལ་ཁབ་གཞན་ག་དང་ཡང་མ་འདྲཝ་སྦེ་ཡོད་མི་འདི་ དབང་གིས་མནེམ་ཏེ་བཞག་ནིའི་ཉེན་ཁ་སྦོམ་ཡོད་པའི་ཁར་ འདིའི་ནང་ལས་ཡང་ མི་དབང་ཡབ་སྲས་ཚུ་གི་ཐུགས་དགོངས་འགྲུབ་ཐབས་ལུ་ ང་བཅས་མི་སེར་ཚུ་གིས་ཁས་བླངས་ཕུལ་ཏེ་ དངོས་སུ་ཕྱག་ཞུ་དགོ་ནི་ཨིན་པས།

མ་གཞི་སླབ་སྲོལ་ཅིག་ལུ་ ནམ་དུས་དང་བསྟུན་པའི་གོ་གྱོན། །དུས་ཚོད་དང་བསྟུན་པའི་ཟས་ཟ། །ཟེར་སླབ་སྲོལ་འདུག ཨིན་རུང་ག་འཆེས་ར་དྲགས་པ་ཅིན་ འཇིག་རྟེན་པའི་དཔེ་གཏམ་ལུ་ དྲགས་ར་དྲགསན་ཨའི་གི་ཨོམ་ཡང་དུག །ཟེར་སླབ་དོ་བཟུམ་སྦེ་ ཡུདཔ་ཅིག་ཁ་ལས་ག་མེན་གུ་མེན་འགྱོ་ནིའི་ཉེན་ཁ་ཡོདཔ་ལས་ ད་ལྟོ་འགོ་དང་འགོ་ལས་ར་ ད་རེས་དར་ཁྱབ་ཡོད་པའི་མིང་ཚིག་ཚུ་དང་འདྲན་འདྲ་ དེ་བསྒང་སླབ་སྲོལ་ཡོད་པའི་མིང་ཚིག་ཚུ་ཡང་ དར་ཁྱབ་གཏང་དགོ་པའི་དུས་ཚོད་ཕྱིསན་མ་ཤེས་མི་ཧ་ནི་ཨིནམ་ལས་ ཤོ་མཉམ་འབྲུག་མི་ག་ར་དང་ འདིའི་ནང་ལས་ཡང་ འབྲེལ་ཡོད་ལས་སྡེ་དང་མི་ངོམ་ཆ་ཁྱབ་ཀྱིས་ རབ་རུབ་གཏང་སྟེ་རྩ་འགེངས་གནང་ཟེར་ཞུ་ནི་ཨིན།

ང་བཅས་ཀྱིས་འབད་ཚུགསཔ་ཟེར་རུང་ རྫོང་ཁ་སླབ་ཐངས་ཀྱི་ལཱ་སྐོར་འདི་ མི་མང་གིས་མཁྱེན་ཚུགས་ནིའི་དོན་ལུ་ མི་སྡེའི་བརྡ་བརྒྱུད་ཀྱི་ཐོག་ལས་དར་ཁྱབ་གཏང་ནི་དེ་ཨིནམ་ལས་ ཐུགས་མ་ཁོམ་རུང་ཚར་གཅིག་གཟིགས་ཞིན་ན་ ཐུགས་འཆར་རེ་བཀོད་གནང་ཟེར་ཞུ་ནི་ཨིན།།

སྦོང་སྒོར་ཟེར་བའི་མིང་བྱུང་ཚུལ།

ཆུ་ཁ་རྫོང་ཁག་གི་འོག་ལུ་ཨིན་མི་ སྦོང་སྒོར་གཡུས་ཚན་འདི་ བརྒྱད་འདུག་ལས་ཀི་ལོམི་ཊར་༥དེ་ཅིག་གི་ས་ཁར་ སྣུམ་འཁོར་ལམ་འོག་ལས་མར་ལྟ་སྟེ་ ལུངམ་ནང་འབབ་སྟེ་ ཝང་ཆུ་བརྒལ་ཞིནམ་ལས་ཁ་ཡར་ལྟ་སྟེ་ ཆུ་ཚོད་ཕྱེད་དང་གཉིས་ཀྱི་ས་ཁར་ སྦོང་སྒོར་གཡུས་ཚན་འདི་ ག་ནེ་བ་ཉམས་དགའ་ཏོག་ཏོ་སྦེ་ཆགས་ཏེ་འདུག 

དེ་བསྒང་བོད་རྒྱལ་ཁབ་འདི་ རྒྱ་ནག་གིས་དབང་པའི་སྐབས་ བོདཔ་ཚུ་འབྲུག་རྒྱལ་ཁབ་བརྒྱུད་དེ་ རྒྱ་གར་རྒྱལ་ཁབ་ནང་འགྱོ་བའི་སྐབས་ ས་ཁོངས་འདི་ནང་སྒར་བཏབ་སྟེ་ འདི་ནང་ང་བཅས་ཀྱིས་འབངམ་ཨིན་ཟེར་སླབ་ནི་འདི་གིས་ ས་གནས་ཀྱི་མིང་འབང་སྒོར་ཟེར་དར་ཁྱབ་སོང་ནུག

སླབ་སྲོལ་གཅིག་ལས་འབདན་ རིའི་བཟོ་རྣམ་བོང་ཀུའི་མགུ་ཏོ་བཟུམ་སྦེ་ཡོད་ནི་འདི་གིས་ ས་གནས་ཀྱི་མིང་ཡང་བོང་མགོ་ཟེར་བཏགས་བཏགསཔ་ཨིནམ་སྦེ་བཤདཔ་ཨིན་པས།

འབྲི་མི་ མཁྱེན་རབ།

ངག་གཤིས་དར་ཁྱབ་གཏང་དགོཔ་འདུག

༉  འབྲུག་རྒྱལ་ཁབ་རང་དབང་རང་བཙན་གྱི་ངོ་རྟགས་དང་། ལམ་ལུགས་སྲོལ་གྱི་གཞི་རྟེན་གཙོ་བོ་ཅིག་ རྒྱལ་ཡོངས་སྐད་ཡིག་འདི་ཨིན་ནི་འདི་གིས་ བརྩི་མཐོང་བསྐྱེད་དེ་དར་ཁྱབ་གཏང་དགོཔ་འདི་ འབྲུག་པའི་མི་སེར་ཆ་མཉམ་ལུ་ཕོགཔ་ཨིན་པས།

སྐད་ཡིག་མཁས་མཆོག་ཚུ་གིས་འབད་བ་ཅིན་ སྐད་ཡིག་སྐྱེ་ནི་དང་ཤི་ནི་ཡོདཔ་མ་ཚད་ དོ་མཉམ་གྱི་མིང་ཚིག་ལེ་ཤ་ཡོད་པ་ཅིན་ ཁ་སྐད་ཕྱུགཔོ་སྦེ་ཆ་བཞག་དོ་ཡོད་རུང་ ན་འཐན་སྦེ་དབྱེ་བ་དཔྱད་དེ་ལྟཝ་ད་ ཚིག་གསརཔ་བཟོ་མི་དང་མགུ་མཇུག་སློག་སློགཔ་ ཕྱིའི་ཁ་སྐད་དང་སྦྱེལ་ཏེ་ འབྲི་སྲོལ་དང་སླབ་སྲོལ་ལུ་ཤུགས་ཐལ་མི་འདི་གིས་ དང་ཕུ་སླབ་སྲོལ་ཡོད་པའི་མིང་ཚིག་མང་ཤོས་ འགྲོས་ཀྱིས་གཏང་སྟེ་ཡལ་ནིའི་ཉེན་ཁ་སྦོམ་འདུག དེ་འབད་ནི་འདི་གིས་ ད་ལྟོ་དུས་ཚོད་མ་ཕྱིསཔ་ཅིག་ལས་ སློབ་གྲྭ་ཁག་ལུ་ ངག་གཤིས་ཀྱི་མིང་ཚིག་ཚུ་དར་ཁྱབ་གཏང་ནིའི་ལམ་ལུགས་ཅིག་འགོ་བཙུག་ཚུགས་པ་ཅིན་ དེ་བསྒང་གི་མིང་ཚིག་ཚུ་ཡང་ ད་ལྟོ་དར་ཁྱབ་ཡོད་པའི་མིང་ཚིག་ཚུ་དང་འདྲན་འདྲ་དར་ཁྱབ་གཏང་མ་ཚུགསཔ་མི་འོང་ཟེར་མནོཝ་མས།

སྐྱེངས་མཁར་གྱི་མིང་གནས་ཆགས་ཚུལ།

༉ ཧེ་མ་ལས་ར་གཡུས་ཀྱི་མིང་ ཡིག་ཐོག་ལུ་སྐྱེངས་མཁར་ཟེར་འབྲི་སྲོལ་ཡོད་རུང་ ལ་ལུ་ཅིག་གིས་ཁུངས་བཀལ་དོ་བཟུམ་སྦེ་འབད་བ་ཅིན་ སྔོན་དང་ཕུ་ལྷ་སྲས་གཙང་མའི་སྲས་སྦོམ་ཤོས་ཅིག་གིས་ ས་ཁོངས་འདི་ནང་ལྷོད་དེ་ ཕོ་བྲང་བཞེངས་ཡོདཔ་ད། གཅེན་ཟེར་མི་འདི་སྤུན་ཆ་སྦོམ་ཤོས་ལུ་སླབ་ནི་འདི་གིས་ ས་གནས་ཀྱི་མིང་གཅེན་མཁར་ཟེར་ཨིནམ་སྦེ་བཤདཔ་ཨིན་པས། 

ཨིན་རུང་ཞིབ་འཚོལཔ་ལ་ལུ་གིས་འབདན་ གཡུས་ཀྱི་ལྟག་ལུ་རྡོའི་བཟོ་རྣམ་ དུར་ཁྲོད་བདག་མོའི་མགུ་ཏོ་བཟུམ་སྦེ་ཡོད་ནི་འདི་གིས་ ས་གནས་ཀྱི་མིང་ཡང་ཀེང་་མཁར་ཟེར་བཏགས་ཡོདཔ་སྦེ་ཨིན་པས། 
ཨོ་རྒྱན་རིན་པོ་ཆེ་གི་གནས་དོམ་ཚང་རོང་ཟེར་མི་དེ་ཡང་ སྐྱེངས་མཁར་ལུ་ཡོདཔ་ཨིན་པས།
སྐྱེངས་མཁརཔ་ཚུའི་ འཚོ་བ་གཙོ་བོ་ཕྱག་བསིལ་ཇ་དོམ་བཟོ་སྟེ་ཕར་ཚུར་བཙོང་ཞིནམ་ལས་ མི་ཚེ་སྐྱོང་དོ་ཡོདཔ་ཨིན་པས།
ར་ཁུངས་བཀལ་མི་ ཨ་བརྒྱ་བསོད་ནམས་སྟོབས་རྒྱས།

ལྗོངས་ཐང་།

ཀྲོང་གསར་རྫོང་ཁག་ ནུབ་སྦི་རྒེད་འོག་ལུ་ཆགས་ཏེ་ཡོད་མི་ ལྗོངས་ཐང་གཡུས་ཚན་འདི་ རྫོང་ཁག་ལྟེ་བ་ལས་ནུབ་ཁ་ཐུག་ལུ་ཕོགཔ་ཨིན། 
ས་ཁོངས་འདི་ལྗོན་ཤིང་སྣ་ཚོགས་ཀྱིས་མཐའ་བསྐོར་ཏེ་ ཧོ་ལྗོང་ལྗོ་སྦེ་ཡོདཔ་མ་ཚད་ གཡུས་ཚན་འདི་ས་ཁ་མཐོ་ས་ཆགས་ཏེ་ཡོད་ནི་འདི་གིས་ ཧེ་མ་གཡུས་ཀྱི་མིང་ལྗོངས་མཐོ་ཟེར་སླབ་དོཝ་ཨིན་རུང་ བར་སྐབས་ཅིག་ལས་མིང་གི་ཟུར་ཉམས་ཏེ་ གྱོང་ཐང་ཟེར་དར་ཁྱབ་སོང་ནུག ཨིན་རུང་རྒན་ཤོས་ལ་ལུ་གིས་འབདན་ ས་ཁོངས་འདི་ནང་ འབྲོང་གིམ་ཙི་མང་སུ་འཁྱམ་སྟེ་སྡོད་དོ་ཡོདཔ་ལས་ ས་གནས་ཀྱི་མིང་ཡང་འབྲོང་ཐང་ཟེར་ཡང་སླབ་སྲོལ་འདུག་ཟེར་ཨིན་པས།