ཆ་དང་འབྲེལ་བའི་དཔྱེ་གཏམ།

1. ཆ་རོགས་ཞན་པ་ཨ་དྲི་མནམ།
2. ཆང་བ་ཆུ་ཞིམ། །མེ་བ་ཐལཝ་དྲོ། །
3. ཆང་མར་འཛུལ། །གཏམ་ཡར་འཐོན། །
4. ཆང་ལེན་ཆུ་ཡིས་འཇལ།
5. ཆང་བཞུ་མི་གིས་འཐུང་། །བློ་ཤེས་མི་གིས་སླབ། །
6. ཆང་འཐུང་རིགཔ་གསལ།
7. ཆརཔ་ཕར་ཀ་རྐྱབ། །ཟིལཔ་ཚུར་ཁར་རེག །
8. ཆརཔ་ཆུ་ཡི་གྲོགས།
9. འཆམ་ཚེ་ཧིང་གཏམ་མ་བཤད། །རྒྱགས་ཚེ་ཁ་ལན་མི་འབྱོར། །
10. མཆེཝ་ཅནམ་དང་རྭཝ་ཅནམ་ལུ་བློ་མ་གཏད།
11. ཆུ་མ་འོངམ་ལས་གཡུར་བ། །ནད་མ་འོངམ་ལས་རིམ་གྲོ། །
12. ཆུ་དང་མ་ཕྱདཔ་ལས་ལྷམ་ཕུད།
13. ཆུ་ཡོད་སར་ཆརཔ།
14. ཆུ་དང་རྡུལ་མ་དམའ་སར་བུད།ཆུ་གིས་འབག་པའི་ལགཔ་ག་བཤེད་མེད། །ནང་དོག་པའི་ཁ་ལས་ག་སླབ་མེད། །
15. ཆུ་དྭང་པ་ཉ་གསལ། །
16. ཆུ་དགུན་སུ་བ་དྭངམ་མེད། །སེམས་རང་སེམས་ལས་གསལཝ་མེད། །
17. ཆུ་ལས་ཐལ་རུང་། །བརྡར་རྡོ་ལས་མི་ཐལ། །
18. ཆུ་འགྱོ་བའི་ཞོར་ཁར་རང་འཐག་དྲུད།
19. ཆུང་ཚེ་རྟ་དང་མ་འདྲིས་པར། །སྦོམ་ཚེ་སྒ་ཆས་རྐྱབ་མ་ཤེས། །
20. ཆུ་ཕུད་གཅིག་ལུ། །ལྷ་གསོལ་གཉིས་མི་བཏུབ། །
21. ཆུ་ཤུལ་འགྱོ་བར་ཧེ་མའི་ལང་ཤོར།
22. ཆུ་ལྷག་རྒྱ་གར་ཤར། །ནོར་འཕགས་པའི་དགེ་འདུན། །
23. ཆུནི་ཟར་ལས་དབོག་ཆེ། །ཤིངནི་རི་ལས་འཐུ་ཆི། །
24. ཆུ་མོའི་གཞུང་ཁར། །ཉ་མོའི་ཕོཝ།།
25. ཆོས་རང་གིས་འབད་དེ་སངས་མ་རྒྱསནི། །རོགས་ཀྱིས་འབད་དེ་སངས་མི་རྒྱས།
26. ཆོསཔ་རྒས་ཅིག་གྱལ་མགུ། །བོད་རྒས་ཅིག་གྱལ་མཇུག །
27. ཆོས་མ་གོ་བའི་རྣཝ་སྤུ་སི་སི།
28. ཆོས་ཟབ་སར་བདུད་ཟབ།
29. ཆོསཔ་ཕྱེད་གོ་བས་ལྷག

ཅ་དང་འབྲེལ་བའི་དཔྱེ་གཏམ།

1. ལྕགས་ལུ་ཞུན་དང་ཞུན་ལུ་མཐར།
2. ལྕགས་ཨིན་སིང་སི་དང་། །རྡོ་ཨིན་ཀྲག་ཀྲ། །
3. ལྕགས་དང་དྲོནམོ་ཚ་ཏོམ་བསྣལ།

ང་དང་འབྲེལ་བའི་དཔྱེ་གཏམ།

ངེའི་གདོང་བ་ཁྱོད་ཀྱི་རྒྱལ་གསལ།
སྔུའི་གདོང་ལུ་ལེགས་གོ་མེད། །འཐབ་པའི་ཚིག་ལུ་ཧནམ་མེད། །
ངོ་ཚ་བ་གལ་ཆེཝ་གདམ།

ག་དང་འབྲེལ་བའི་དཔྱེ་གཏམ།

1. ག་བ་ག་དྲག་མི་ཤེས།
2. གངས་བར་ནང་གི་ཆུ་འཐུང་། །སྤྲིན་བར་ནང་གི་ཉིམ་བསྲོ། །
3. དགའཝ་རང་གིས་བཟོནི་ག་བཟོ། །སྐྱོམ་རང་གིས་སློངནི་ག་སློང་། །
4. དགའཝ་ཟད་སྐྱིདཔ་རྫོགས་རྫོགས་པའི་མི།
5. རྒྱ་བརྡུང་ཟ། །བོད་བཞོང་ཟ། །
6. སྒྱུར་མ་ཚུགས་པའི་ཆུ་སྒྱུར་བ་འདི། །སྒྱུར་ཚུགས་པའི་རྡོ་འགྱིརཝ་དྲག །
7. མགུ་འཁྱུ་བ་གདོང་དགཔ།
8. གྱི་དང་ཕོརཔ་གློ་ལུ་བཞག །ཆང་དང་འཐབམོ་ག་ཕྱད་མེད། །
9. གྱི་རིང་ཐུང་གོམས་པའི་གཡབ་ཨིན།
10. དགོན་པའི་རོ་ཁྱི་མ་བརྡུང་། །བླ་མའི་ཐུགས་ཁར་ཕོག་འོང་།།
11. གྱོས་མི་ལུ་འདྲི། །ཐག་རང་གིས་བཅད།།
12. གྱང་བར་ན་ར་འཐབ་དེས་འཐབ། བྱག་བར་ན་ར་འཐབ་དེས་འཐབ། དབྱེ་དཔྱད་མཛད་གནང་།
13. གླང་དགའ་སར་ཐོངམ་ཆག
14. གླང་ཅུང་དོག་ཆ་འགྲིགནི། །བཏབ་པའི་ལོ་ཐོག་ལེགས། །
15. གླང་གཉིས་འཐབ་ད་གཅིག་རྒྱལ་དགོ།
16. གླང་ཅུང་འབདནི་རྨོ་བཏུབ། །བ་ཐངམ་འབདནི་བཞོ་བཏུབ། །
17. གླང་རྒྱ་ཚ་གིས་ཨ་བ་ལམ་ལྟག་ཡང་གཏང་འོང་། །ལམ་འོག་ལུ་ཡང་གཏང་འོང་།
18. གླང་གིས་རྨོ་མ་སྟེར་བ་དང་། །བ་ཡིས་བཞོ་མ་སྟེརཝ་མི་འོང་། །
19. རྒྱུ་མ་སྤགས་ཀྱི་གྲས་ཁར་མི་ཚུད།
20. རྒྱུ་བར་སྟོང་གཏངམ་སྦྱིན་པ་མིན། །གླང་བརྙ་བར་གཏངམ་དཔའ་རྟགས་མིན།
21. གླེན་གོ་ལྟད་མར་འགྱོ་བར། །མགོ་དང་རྐང་པས་གོ་མ་ཆོད། །
22. སྒྱིད་པར་ཤ་མེད་པ། །གཉའ་བར་བྱ་ལ་བཀལ། །
23. འགྱིར་མ་ཚུགས་པའི་རྡོ་འགྱིར་བ་འདི། །བསྒྱུར་ཚུགས་པའི་ཆུ་སྒྱུརཝ་དྲག །
24. གོང་ཕུ་ནང་གི་མདའ་གཞུ། །བཀང་ས་ཡོད་རུང་རྐྱབ་ས་མེད། །

ཁ་དང་འབྲེལ་བའི་དཔྱེ་གཏམ།

1. ཁ་མཁས་མིའི་དཔོན།།མཇུག་དོག་སར་ཚུདནི་དེ་གིས་ཚུད།།ལཱ་ཤེས་མིའི་གཡོགཔོ།།ཟ་ཞིམ་ཅིག་ཟནི་དེ་གིས་ཟ།།
2. ཁ་ཨོམ་ས་མ་ཎི་གྱངས་མང་རུང་།།ཐུག་ས་མདོ་འཛིན་རྩ་བར།།
3. ཁ་ཐེག་ཁུར་འདྲོང་།།
4. ཁ་རྒྱང་པ་རླུང་འཛུལ། །རླུང་འཛུལ་བ་སོ་འཁོལ།།
5. ཁ་ལས་འཐོན་ཚེ་རླུང་། །རླུང་སྤར་བཞམ་ཚེ་གསེར།།
6. ཁ་བཤད་ཆུ་ཡི་ལྦ་ག །ལག་ལེན་གསེར་གྱི་ཐིག་པ།།
7. ཁ་བཤད་ཆུ་ཡི་ལྦ་ག །ནོརབུ་རྒྱ་མཚོའི་གཏིང་ལུ་མི་ཐིམ།།
8. ཁ་དང་ལགཔ་འཐབ་ད་ཀི་ལི་ཟུར་ཁ།
9. ཁག་ཆེ་མི་ཆེ་བླམ་ཆེ། །བླམ་བ་རང་ཆེ། །
10. ཁ་ལུ་གུ་རམ་བཙུགས།།ཧིང་ཁར་ལ་ཆུ་བཀལ།།
11. ཁ་གིས་ཨ་ཝ་ཟ།།མཆུ་ཏོ་དར་གྱིས་འཕྱག།
12. ཁག་པའི་ལཱ་ཅིག་མ་འབདནི། །མངར་བའི་ཟས་ཅིག་མི་འཐོབ།།
13. ཁྱི་མོ་མཇུགམ་མ་གཡུགནི། །ཁྱི་ཕོ་རྣཝ་མི་དཀྲོག།
14. ཁྱི་ཟ་ས་ལས་ཧབ།
15. ཁྱིའི་དགའ་ཚོར་མཇུགམ། །མིའི་དགའ་ཚོར་སེམས། །
16. ཁྱི་གྱང་གུར་ཨེབནི། །ཤོར་ནི་ཆུ་དང་ཨ་ཝ། །ཁྱི་གྱང་གུར་ཨེབནི།།བཏབ་ནི་སོ་ར་ཨིན།།དབྱེ་དཔྱད་གནང་།
17. ཁྱི་ནུབ་ཁྱི་བཟངམ་ཇོ་གིས་ཤེས།
18. ཁྱི་དང་བུཚ་འཛུམ་མ་སྟོན། །སྟོན་ར་སྟོན་ལྡན་ལྕག་སྟོན། །
19. ཁྱིམ་ཚང་བ་ཤི་རུང་། །མྱ་ངན་ཞག་གསུམ།
20. ཁུ་རུ་པའི་ཆང་ནང་། །ཞོལ་ལེམ་གྱི་དྲིམ་ཅིག་ཡོད།།
21. མཁོ་ཐང་ཁར་གླང་རྨོ་ནི་དང་། །དྭང་ཆུ་ཟམ་པར་ཉ་བཟུང་ནི་རྟགས་མི་མཐུན། །
22. ཁུར་ཨ་པས་འབག་ཚེ་ཡང་ཡང་འདྲ། །ཟས་ཨ་མས་ཟ་ཚེ་ཞིམ་ཞིམ་འདྲ། །
23. ཁུར་ཆ་གཡག་གིས་འབག །སྐད་འབྱོགཔ་གིས་རྐྱབ།
24. ཁེ་གྱོང་མེད་པའི་ཞིང་ཁར། །ཡང་རྗིད་མེད་པའི་གླང་རྨོ།

དྲན་གསོ་   ལྟག་ལུ་བཀོད་དེ་ཡོད་པའི་དཔྱེ་གཏམ་ཚུ་   ཨིནམ་མེན་གྱི་དབྱེ་བ་དཔྱད་ནིའི་དོན་ལུ་མ་གཏོགས་   མཐའ་དཔྱད་སྦེ་བཀྲམ་ནི་མེནམ་ཐུགས་ཁར་བསྣམ་གནང་།

ཀ་དང་འབྲེལ་བའི་དཔྱེ་གཏམ།

1. དཀའཝ་མ་སྤྱདནི་འབྲས་བུ་མི་འཐོབ།
2. སྐྱིདནི་གནམ་མཁའི་བྱ་ཡང་འཁོར། །སྡུགནི་མཆན་གྱི་བུ་ཡང་སྤང་། །
3. སྐྱེནི་རང་གིས་སྐྱེས་བའི་བུ། །གསགནི་རང་གིས་བསག་པའི་ནོར། །

རྫོང་ཁ་སླབ་ཐངས་ཀྱི་ལཱ་སྐོར།

 ༉   རྫོང་སླབ་ཐངས་སྡེ་ཚན་གྱིས་   ལོ་ངོ་༣ལྷགཔ་ཅིག་གི་རིང་ལུ་   མི་སྡེའི་བརྡ་བརྒྱུད་ཝི་ཅེཊ་ཐོག་ལས་   གསུང་གྲོས་གནང་སྟེ་   དེ་བསྒང་སླབ་སྲོལ་ཡོད་པའི་མིང་ཚིག་ཐོ་བཀོད་དེ་ཡོད་མི་ཚུ་  ད་རེས་ནངས་པ་དར་ཁྱབ་ཡོད་པའི་ཚིག་ཚུ་བཟུམ་སྦེ་   དར་ཁྱབ་གཏང་ནི་ལུ་རྩ་འགེང་དོ།

ཨིན་རུང་སེལ་ཏེ་ཟ་བ་ལྐོལམ་མི་ཐོག ཟེར་སླབ་དོ་བཟུམ་སྦེ་  གསུང་གྲོས་གནང་པའི་བཅུད་ག་དེ་སྦེ་ཐོན་ཡོདཔ་ཨིན་ན་ དཔེ་བཟུམ་ཅིག་འོག་ལུ་ཡོད།
ཀ་ཁལ་ཕྱད་དང་གཉིས་ལས་ རེ་རེ་ལུ་དཔྱེ་རེ་བཀོད་དེ་ཡོད་པའི་ མིང་ཚིག་ཚུ་གི་གོ་དོན་དང་  ཡིག་སྡེབས་དག་བཅོས་འབད་དགོཔ་ཡོདཔ་ལས་ མཐའ་དཔྱད་མེནམ་ཐུགས་ཁར་བསྣམ་གནང་།

ཀ༽ དཀར་སྒྲ་རྒྱུ་སྒྲ།

ཁ༽ ཁ་བཀལ་མགུ་བཀལ།

ག༽   གླ་འགྲིག་ལྟོ་འགྲིག

ང༽  མངར་ཆོས་ཆོས།

ཇ༽   རྗེས་ཧིང་བརྡར།

ཉ༽   ཉིན་ཞག་བུབ་དགུ།

ཏ༽   རྟ་ཕྲག་མི་ཕྲག

ཐ༽   ཐོབ་ཆགས།

ད༽   དུ་རུ་རུ།

ན༽   ནོར་བརྗེ་ཨ་དྲགས།

པ༽   པ་རི་སུ་རི།

ཕ༽   ཕག་ཕོག

བ༽   བར་མ་རི་ཅུ།

མ༽   མིག་མི་འཇེབས།

ཙ༽   རྩིངམ་ཉེས་དྲགས།

ཚ༽   ཚ་སྦྱེལ་ཐོར་ཐོ།

ཛ༽   རྫ་རྡུགས།

ཞ༽   ཞོན་བརྒྱུ།

ཟ༽   ཟམ་ཐག་ཆོད།

འ༽   འོང་ཅུ་ཁེ་ཁེ།

ཡ༽   གཡོ་ཏོག

ར༽   རུམ་ཐུད།

ལ༽   ལག་བརྗེ་ལུགས་བརྗེ།

ཤ༽   ཤ་ཀྲེག་སྐྱི་ཀྲེག

ས༽   སྲེག་གོག

ཧ༽   ཧོ་ཏོམ་རྩིས།

ཨ༽   ཨུག་དྲི།

 དྲན་གསོ་   དེ་བསྒང་སླབ་ནི་ཡོད་པའི་ མིང་ཚིག་ག་དེ་སྦེ་ཡོད་ག་མཁྱེན་ནིའི་དོན་ལུ་དཔེ་སྦེ་ཕུལ་ཕུལཝ་མ་གཏོགས་ ཞུ་དག་རྐྱབ་རྐྱབ་མེནམ་ལས་   གཞན་ལུ་སྤེལ་མ་ད་ཟེར་ཞུ་ནི་དང་།  ཧེ་མ་ལས་མཁྱེན་མི་ཚུ་ཐུགས་བསུན་མ་ཆེ་ཟེར་གསོལ་བཏབ་ཞུ་དོ་ལགས།