དཀོན་འབར།

མོང་སྒར་རྫོང་གི་གདོང་ཕྱོགས་ ཧེ་མ་གཡུས་ཀྱི་མིང་གདོང་ཕྱུག་ཟེར་སླབ་ཨིན་རུང་ དུས་རབ་༧པ་སྐོར་ཆ་ལུ་ གཡུས་ཚན་དེའི་སྦོ་ལོགས་ཁར་ མཚོ་སྦོམ་ཅིག་ཡོད་མི་དེ་ནང་གི་མཚོ་གླང་དང་ གདོང་ཕྱུག་གཡུས་ཚན་གྱི་བ་མེན་གཉིས་འཐབ་སྟེ་ མཚོ་གླང་བསད་ད་ནི་འདི་གིས་ མཚོ་དེ་ཡང་གཡུས་འཐོན་ཏེ་ ཁེངས་བུ་ལི་ལུ་སྤོ་ཡར་སོང་ནུག  སྔོན་མ་འབད་བ་ཅིན་ མཚོའི་སྦོ་ལོགས་ཁར་ རྡོའི་ཧིའུ་ནང་ལུ་ རེད་བྲེ་གང་བརྡུངམ་ད་ ཆུམ་བྲེ་དོ་འཐོན་ནི་ཡོད་རུང་ མཚོ་སྐམ་སོང་ཞིན་ན་ལས་ ཆུམ་ཉུང་སུ་ཅིག་ལས་བརྒལ་འཐོན་ནི་མེདཔ་ལས་ ཧིའུ་འདི་ལྕགས་ངར་གྱིས་འབལ་ལྟཝ་ད་ ཕུ་ཀྲེ་གཉིས་འཐོན་ཏེ་ཕུར་ཡར་སོངམ་ལས་ གཡུས་ཚན་འདི་ནང་ ཉིནམ་གཅིག་ལས་ཉིནམ་གཅིག་ ཟ་འཐུང་དཀོན་སུ་སྦེ་མུ་གེ་འཐོན་ཡོད་རུང་ བླམ་ཅིག་གིས་ ད་ལྟོ་ཟ་འཐུང་དཀོན་རུང་ ཤུལ་ལས་འབར་ནི་འོང་ཟེར་གསུངས་ནི་འདི་གིས་ གཡུས་ཀྱི་མིང་ཡང་དཀོན་འབར་ཟེར་དར་ཁྱབ་སོང་ནུག